Ūlttyq qauıpsızdık komitetı Şyǧys Qazaqstan oblysy äkımınıŋ bırınşı orynbasary bolǧan Jaqsylyq Omarǧa qatysty qylmystyq ıstıŋ män-jaiyn jariialady, dep habarlaidy «Adyrna» tılşısı.
Şeneunıktıŋ kınäsın moiyndaǧany turaly mälımetter vedomstvo tüsırgen derektı filmde aityldy. ŪQK mälımetınşe, 2025 jyldyŋ soŋynda Şyǧys Qazaqstan oblysy boiynşa ŪQK departamentınıŋ qyzmetkerlerı Jaqsylyq Omardyŋ qaramaǧyndaǧy qyzmetkerler men vedomstvolyq ūiymdardan jüielı türde aqşa bopsalaǧany turaly aqparat alǧan. Ol qaramaǧyndaǧylarǧa qyzmettık ösuge yqpal etemın dep uäde bergen, al bas tartqan jaǧdaida jūmystan şyǧaramyn nemese lauazymyn tömendetemın dep qorqytqan.
2026 jyldyŋ 4 aqpanynda Omardyŋ qarajat alu shemasyn qūjattau jäne tüsınu üşın qarajattyŋ bır bölıgı tapsyrylǧan.
Komitet şeneunıktıŋ Öskemendegı jeke üiınde jürgızılgen tıntudıŋ kadrlaryn körsettı. Vedomstvo mälımetınşe, tıntu barysynda aqşa qarajaty tärkılengen. Alǧaşqy jauap alu kezınde Jaqsylyq Omar öz kınäsın moiyndaǧan.
Tergeu barysynda Qylmystyq kodekstıŋ 190-babynyŋ 3-bölıgı boiynşa (alaiaqtyq) qosymşa derek anyqtalǧany da habarlandy. Nätijesınde sot Jaqsylyq Omardy 6 jylǧa bas bostandyǧynan aiyru jazasyna kesken.
Aita keteiık, Jaqsylyq Omarǧa ırı kölemde alaiaqtyq jasau jäne ırı kölemde para alu aiyptary taǧylǧan bolatyn. Sotta ıs boiynşa ekı epizod qaraldy. Şeneunık öz kınäsın moiyndap, aiyppūl taǧaiyndaudy sūraǧanymen, bırınşı satydaǧy sot ony 6 jylǧa bas bostandyǧynan aiyrdy. Keiın ol apelliasiialyq şaǧym tüsırgenımen, ükım özgerıssız qaldyryldy.
Jaqsylyq Omar 2025 jyldyŋ säuırınde Şyǧys Qazaqstan oblysy äkımınıŋ bırınşı orynbasary bolyp taǧaiyndalǧan. Oǧan deiın alty jyl boiy Öskemen qalasynyŋ äkımı qyzmetın atqarǧan.
