30 mausymda Şuşa qalasynda Türkı memleketterı ūiymyna müşe elderdıŋ dın ısterıne jauapty memlekettık organdary basşylarynyŋ alǧaşqy kezdesuı aiaqtaldy, dep habarlaidy «Adyrna» tılşısı.
AZƏRTAC agenttıgınıŋ mälımetınşe, kezdesu qorytyndysy boiynşa qūrylymdar arasyndaǧy yntymaqtastyqtyŋ institusionaldyq negızderı men aldaǧy bırlesken qyzmettıŋ negızgı baǧyttaryn aiqyndaityn 11 tarmaqtan tūratyn kommiunike qabyldanǧan.
Qūjatta türkı memleketterındegı memleket pen dın arasyndaǧy qatynastardyŋ zaiyrlylyq qaǧidattaryna negızdelgen damu erekşelıkterı körınıs tapqan. Sondai-aq dıni saladaǧy täjıribe almasudy keŋeitu, dıni bılım beru baǧytyndaǧy yntymaqtastyqty damytu, jastardy ūlttyq-ruhani qūndylyqtarmen tärbieleu, otbasy institutyn nyǧaitudaǧy äielderdıŋ rölın arttyru jäne sifrlyq aqparattyq ortada dıni aǧartuşylyq jūmystardy küşeitu mäselelerı qamtylǧan.
Būdan bölek, Äzerbaijannyŋ okkupasiiadan azat etılgen aumaqtaryndaǧy tarihi-dıni jäne mädeni mūrany qalpyna keltıru ısıne qoldau bıldırudıŋ maŋyzy atap ötılgen.
Kezdesudı joǧary deŋgeide ūiymdastyruǧa körsetken qoldauy men jasalǧan jaǧdailar üşın Äzerbaijan prezidentı İlham Älievke alǧys bıldırıldı.
Kezdesu soŋynda kelesı basqosudy 2027 jyly Qazaqstanda ötkızu turaly şeşım qabyldandy.
