Resei Qazaqstanǧa şamamen 50 myŋ tonna Aİ-92 markaly benzin jetkızu turaly ötınış jasaǧany belgılı boldy. Būl turaly Reuters agenttıgı mūnai-gaz salasyndaǧy derekközderge sılteme jasap jariialady, dep habarlaidy "Adyrna".
Agenttıktıŋ mälımetınşe, Reseide soŋǧy uaqytta bırqatar mūnai öŋdeu zauyttarynda jospardan tys jöndeu jūmystary jürgızılıp, keibır öndırıs oryndarynyŋ jūmysy uaqytşa toqtaǧan. Sonyŋ saldarynan eldegı benzin öndırısı ötken jylmen salystyrǧanda şamamen 25 paiyzǧa tömendegen. Işkı naryqtaǧy tapşylyqtyŋ aldyn alu üşın Resei körşı memleketterden qosymşa janarmai jetkızu mümkındıgın qarastyryp otyr.
Alaida Qazaqstan bilıgı äzırge mūndai ötınıştıŋ tüskenın rastaǧan joq. Qazaqstannyŋ Energetika ministrı Erlan Aqkenjenov Resei tarapynan benzin jetkızuge qatysty resmi sūranys kelıp tüspegenın mälımdedı.
Sarapşylardyŋ aituynşa, Reseidıŋ Qazaqstanǧa osyndai ötınışpen jügınuı alǧaş ret emes. Būǧan deiın, 2024 jyldyŋ säuır aiynda Reuters agenttıgı Reseidıŋ Qazaqstannan 100 myŋ tonna benzin kölemınde tötenşe rezerv daiyndaudy sūraǧanyn habarlaǧan bolatyn. Ol kezde mūndai şara Reseidegı mūnai öŋdeu zauyttaryna jasalǧan dron şabuyldarynyŋ saldaryn azaitu maqsatynda qolǧa alynǧany aitylǧan edı.
Qazırgı uaqytta ekı el arasyndaǧy benzin jetkızu mäselesıne qatysty naqty kelısımnıŋ bar-joǧy resmi türde rastalǧan joq. Degenmen būl jaǧdai Reseidegı janarmai öndırısınıŋ ahualy men aimaqtaǧy energetikalyq qauıpsızdık mäselelerıne nazar audartty.
