Qazaqstan-Belarýs qarym-qatynasy tek Qazaqstan Prezıdenti Qasym-Jomart Toqaev pen Aleksandr Lýkashenkonyń arasynda talqylanýy múmkin. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy «Adyrna» tilshisi.
«Belarýs Prezıdenti – eks-prezıdentimizben (Nursultan Nazarbaev — red.) burynnan jaqsy aralasady. Sondyqtan olardyń arasynda ózara aıtatyn áńgime kóp. Ózderińiz biletindeı, elimizdiń syrtqy saıasatyn, onyń ishinde shet memlekettermen qarym-qatynasyn aıqyndaý Memleket basshysynyń quzyretine jatady. Sondyqtan, Qazaqstan-Belarýs qarym-qatynasy tek qazirgi prezıdentter arasynda talqylanýy múmkin.
Aıta ketý kerek, Belarýs Respýblıkasymen bizdiń qarym-qatynasymyz strategııalyq sıpatqa ıe, kún tártibinde turǵan máseleler joq. Eki el arasyndaǵy barlyq deńgeıdegi turaqty jáne basqa da baılanystar saqtalady»,—dedi ol.
Buǵan deıin Belarýs prezıdenti Aleksandr Lýkashenko Reseı basshysy Vladımır Pýtınmen jáne Qazaqstannyń tuńǵysh prezıdenti Nursultan Nazarbaevpen telefon arqyly sóıleskenin aıtqan edi.
