Reseıdiń Syrtqy ister mınıstrligi (SIM) AQSh prezıdenti Donald Tramp pen Ýkraına basshysy Vladımır Zelenskıı arasyndaǵy kelispeýshilikti "saıası jáne dıplomatııalyq sátsizdik" dep atady. Máskeý Kıevti "kelissóz júrgizýge qabiletsiz" jáne "beıbitshilikten bas tartty" dep aıyptady, dep habarlaıdy "Adyrna" ulttyq portaly DW-ǵa siltep.
Reseı SIM-niń resmı ókili Marııa Zaharova 1 naýryzda Zelenskııdiń Vashıngtondaǵy sapary sátsiz aıaqtalǵanyn málimdep, ony "beıbitshilikke qarsy" jáne "jaýapkershilikti sezinbeıtin" saıasatker retinde sıpattady.
Mınıstrlik málimdemesinde Ýkraınanyń 2022 jylǵy kóktemde beıbit kelissózderden bas tartqany aıtylyp, Kıev "áskerı qaqtyǵysty jalǵastyrý úshin ótirik pen manıpýlıaııany qoldanady" dep aıyptaldy.
Reseı Qaýipsizdik keńesi tóraǵasynyń orynbasary, eks-prezıdent Dmıtrıı Medvedev Zelenskıı men Tramp arasyndaǵy daýdy "Oval kabınettegi masqara janjal" dep atap, Ýkraınaǵa áskerı kómekti toqtatýǵa shaqyrdy.
Zelenskıı men Tramp arasyndaǵy janjaldan keıin Eýropa kóshbasshylary Ýkraınaǵa qoldaý bildirdi.
Eske sala keteıik, Zelenskıı Tramppen Aq úıdegi kezdesýden keıin kelissózderdi aıaqtamaı, zaldan shyǵyp ketken.
