Bügın, 16 qaŋtarda, QR Mädeniet jäne aqparat ministrı Aida Balaevanyŋ qatysuymen Almatyda tūratyn ädebiet pen öner qairatkerlerıne memlekettık stipendiia tabystaldy.
Memleket basşysynyŋ ökımıne säikes, 2024 jyly memlekettık stipendiiaǧa 75 adam ie boldy.
Aida Balaeva stipendiia iegerlerın qūttyqtap, olardyŋ qazaq mädenietın damytuǧa zor üles qosqanyn atap öttı. Ministr şyǧarmaşylyq ziialy qauym mädeni bıregeilıktı saqtau, el bırlıgın nyǧaitu jäne ūlttyq qūndylyqtardy nasihattau ısınde maŋyzdy röl atqaratynyn aitty.
«Prezident Qasym-Jomart Kemelūly Toqaevtyŋ ūlttyq ruhaniiat turaly ünemı aityp, onyŋ eldık jolyndaǧy orasan küşı men mol mümkındıkterıne qoǧamnyŋ nazaryn audaryp jürgenı mälım.
Jyldaǧy halyqqa arnaǧan Joldaulary, Ūlttyq Qūryltaidaǧy bastamalary, türlı sūqbattarynyŋ özegınde – Täuelsızdık pen Otanşyldyq, Bırlık pen Yntymaq, Ädıldık pen Jauapkerşılık, Zaŋ men Tärtıp, Jasampazdyq pen Jaŋaşyldyq siiaqty bügıngı Qazaqstanǧa auadai qajet qūndylyqtar jatyr!
Halyqty bırlıkke şaqyru, tatulyqty nyǧaitu, jas ūrpaqqa ızgı qūndylyqtardy sıŋıru – mıne, būl sız ben bızdıŋ, iaǧni, ziialy orta men memlekettıŋ ortaq müddesı», – dedı ministr.
Aida Balaeva Memleket basşysynyŋ barlyq bastamalary eŋ aldymen ūlt bırlıgın qalyptastyruǧa, memlekettı nyǧaituǧa jäne azamattardyŋ äl-auqatyn arttyruǧa baǧyttalǧanyn atap öttı.
«Eldıktıŋ märtebesın arttyruda özderıŋızdei mädeniet maitalmandaryna, şyǧarmaşyl qauym ökılderıne jükteler mındettıŋ de auqymy zor. Ärine, osy jolda ziialy qauym ökılderı Prezidentımızge tırek bolyp, qaşanda qoldau bıldıretındıgıne kümänımız joq. Eŋ bastysy – osy igı baǧytta jūdyryqtai jūmylyp, el müddesı üşın aianbai qyzmet etu. Memleket öz tarapynan mädeniet maitalmandarynyŋ şyǧarmaşylyǧyn qoldaudy jüielı türde jalǧastyra beredı», – dedı ministr.
Stipendiia iegerlerı qatarynda Asanälı Äşımov, Bibıgül Tölegenova, Oljas Süleimenov, İranbek Orazbaev, Nūrǧali Nüsıpjan, Tūŋǧyşbai Jamanqūlov, Meruert Ötekeşeva, Amandos Aqanaev, Dulat İsabekov, Tölen Äbdıkūly, Tatiana Tarskaia, Gulver Razieva jäne basqa da körnektı mädeniet qairatkerlerı bar.
Ūqsas jaŋalyqtar
