Foto: Jİ arqyly daiyndaldy
Qazaqstanda BYD Destroyer 05 markaly gibrid avtokölıkterıne qatysty kedendık jäne salyqtyq dau tuyndaudy. Mäsele tek azamattardyŋ şaǧym deŋgeiınde qalyp qoimai, endı Parlament Mäjılısı deputatynyŋ resmi deputattyq saualy arqyly Bas kölık prokuraturasynyŋ qarauyna ūsynyldy.
Qazaqstannyŋ bır top azamaty, naqtyraq aitqanda 51 kölık iesı Mäjılıs deputaty Abzal Qūspanǧa resmi hat joldap, BYD Destroyer 05 markaly gibrid avtokölıkterıne qatysty memlekettık kırıster organdarynyŋ äreketterıne qūqyqtyq baǧa berudı sūrady. Olar öz ötınışterınde BYD Destroyer 05 kölıkterın äkelu kezınde barlyq räsımder qoldanystaǧy zaŋnamaǧa tolyq säikes jürgızılgenın, kedendık tölemder sol uaqytta bekıtılgen erejeler boiynşa tölengenın alǧa tartqan.
DESTROYER NENI BŪZYP KETTI?
Kölık ielerınıŋ mälımetınşe, 2025 jyldyŋ aqpan men qyrküiek ailary aralyǧynda Qazaqstanǧa BYD Destroyer 05 ülgısındegı 5000-nan astam avtokölık äkelıngen.
Olar kedendık räsımdeude sol kezeŋde qoldanysta bolǧan zaŋnama men aldyn ala synyptau şeşımderıne (ASŞ) süiengenın aitady. Iаǧni, importtauşylar barlyq tölemderdı resmi tarifter boiynşa tölep, räsımderdı tolyq aiaqtaǧan. Sol kezeŋde importtauşylar aldyn ala synyptau şeşımderıne (ASŞ/PKR) süienıp, TN VED 8703603099 kody boiynşa räsım jürgızgen. Būl kod sol uaqytta jeŋıldetılgen salyq rejimın qoldanuǧa mümkındık bergenı aitylǧan. Odan keiın TN VED kody özgertılıp, 8703603098 nūsqasy engızılgen jäne būrynǧy räsımderge qatysty qosymşa salyq esepteulerı jasala bastaǧan.
«2025 jyldyŋ qyrküiek aiynan keiın atalǧan kölık qūraldaryn synyptau täsılı özgertıldı. Keiınnen Qazaqstan Respublikasy Qarjy ministrlıgınıŋ Memlekettık kırıster komitetı aumaqtyq memlekettık kırıster departamentterıne azamattarǧa kedendık tölemder men salyqtardy qosymşa esepteu turaly talaptarmen būzuşylyqtardy joiu jönındegı habarlamalar joldaudy tapsyrdy.
Habarlamalardy alǧannan keiın azamattardyŋ basym bölıgı belgılengen merzımde jazbaşa tüsınıktemeler men qarsylyqtaryn ūsyndy. Soǧan qaramastan, aumaqtyq memlekettık kırıster organdary ūsynylǧan dälelderdı tiısınşe qarastyrmai jäne uäjdı jazbaşa jauap bermesten, habarlamalardyŋ oryndalmaǧany turaly şeşımder şyǧardy», - delıngen deputatqa joldanǧan hatta.
BŪǦAU MA, BŪǦATTAU MA?
Daudyŋ maŋyzdy bölıgı – qarjylyq şekteuler. Keibır azamattar men jeke käsıpkerlerdıŋ banktık şottary būǧattalǧany, tölem jasau mümkındıgı şektelgenı, tıptı qarjylyq qosymşalarǧa qoljetımdılıkke kedergı kelgenı aitylady.
Sonymen qatar bır subektke orta eseppen şamamen 1 million teŋgege deiın qosymşa salyqtar men tölemder eseptelgen jaǧdailar tırkelgen.
«Memlekettık kırıster departamentterı jeke käsıpkerlerdıŋ banktık şottaryn būǧattap, jeke tūlǧalardyŋ, onyŋ ışınde Kaspi Bank qosymşalaryna qoljetımdılıgın şektedı. Atalǧan äreketterdı bızdıŋ konstitusiialyq qūqyqtarymyz ben zaŋdylyq qaǧidattaryn öreskel būzu dep esepteimız», - delıngen hatta.
DESTROYER DAUY – DEPUTAT SAUALY
Osy dauǧa bailanysty Mäjılıs deputaty Abzal Qūspan Bas kölık prokuraturasyna deputattyq saual joldady. Deputat öz saualynda kölık prokuraturasy men memlekettık kırıster organdarynyŋ äreketterıne keşendı qūqyqtyq baǧa berudı, sondai-aq qabyldanǧan şeşımderdıŋ zaŋdylyǧyn tekserudı talap ettı.
Deputattyq saualda negızgı nazar bırneşe mäselege audarylǧan. Bırınşıden, 2025 jyly äkelıngen kölıkterdıŋ barlyǧy sol kezeŋdegı zaŋnamaǧa säikes räsımdelgenı jäne aldyn ala synyptau şeşımderı resmi türde qoldanylǧany aitylǧan. Ekınşıden, keiıngı özgerısterdıŋ būrynǧy mämılelerge kerı küşpen qoldanyluy qūqyqtyq normalarǧa qaişy ekenı körsetılgen. Üşınşıden, banktık şottardy jappai būǧattau men qosymşa salyq salu täjıribesı bizneske qysym retınde baǧalanǧan.
Sonymen qatar deputat prokuraturadan tekseru nätijelerın 5 jūmys künı ışınde ūsynudy, zaŋsyz şeşımder anyqtalǧan jaǧdaida olardy joiudy, şottardy būǧattaudy toqtatudy jäne jauapty tūlǧalardyŋ äreketterıne qūqyqtyq baǧa berudı sūrady. Saualda būl jaǧdaidyŋ jüielı sipat alǧany jäne memlekettık organdarǧa degen senımge äser etuı mümkın ekenı de atap ötılgen.
Qazırgı taŋda būl jaǧdaidyŋ qalai şeşıletını prokuraturanyŋ tekseru qorytyndysyna bailanysty bolmaq. Eger zaŋ būzuşylyqtar rastalsa, atalǧan ıs Qazaqstandaǧy kedendık retteu täjıribesıne qatysty maŋyzdy qūqyqtyq presedentke ainaluy mümkın.
