Aqtöbe qalasynda «AMANAT» partiiasynyŋ «TURGYNDAR AMANATY» jobasy aiasynda auqymdy öŋırlık forum ötıp, tūrǧyn üi-kommunaldyq şaruaşylyǧy salasyndaǧy jüielı özgerıster, naqty mäseleler men olardy şeşudıŋ praktikalyq tetıkterı aşyq talqylandy.
Forum alaŋynda memlekettık organdar, deputattar, MİB pen PİK töraǧalary alǧaş ret keŋeitılgen formatta tıkelei dialog qūrdy.
Is-şara aşyq formattaǧy paneldık otyrystan bastalyp, plenarlyq sessiiaǧa ūlasty. Onda tūrǧyn üi qoryn jaŋǧyrtu, injenerlık infraqūrylymnyŋ tozuy, tariftık saiasat, basqaru nysandarynyŋ tiımdılıgı, kondominium obektılerın tırkeu, kommunaldyq qyzmet sapasy jäne tūrǧyndardyŋ tölem tärtıbı siiaqty tüiını tarqamaǧan tüiıtkılderdı aşyq talqyǧa tüstı. Öz kezegınde jergılıktı atqaruşy organdar būl mäseleler boiynşa naqty tüsınıktemeler berıp, bırqatar mäselenı şeşu joldaryn belgıledı.
Plenarlyq otyrysta söz alǧan öŋır basşysy Ashat Şaharov «TURGYNDAR AMANATY» jobasynyŋ tūrǧyn üi-kommunaldyq şaruaşylyǧy salasyn damytuǧa jäne azamattar üşın qolaily ärı qauıpsız orta qalyptastyruǧa serpın beretının atap öttı.
«Bügıngı jiyn – ortaq maqsatqa jetu jolyndaǧy naqty qadamdarymyzdyŋ bırı. Otyrysta köterılgen barlyq mäsele nazarǧa alynyp, olardy şeşu boiynşa tiıstı jūmystar jüielı türde jalǧasyn tabady. Ärbır ūsynys salalyq jospar men ıs-şaralar barysynda eskerılıp, onyŋ oryndaluy tiıstı memlekettık organdar baqylauynda bolady. Ortaq mındetterdı oryndauda jüielı ärı nätijelı jūmys jürgızu qajet», – dedı ol.
Al «AMANAT» partiiasynyŋ Hatşysy Erjan Jylqybaev öz sözınde partiia bastamasymen ıske qosylǧan būl joba köppäterlı tūrǧyn üilerdegı jüielı mäselelerdı şeşudıŋ naqty qūralyna ainalyp otyrǧanyn atap öttı.
«Būl baǧyttaǧy özgerıster – tarifter, abattandyru, jaryqtandyru, liftıler men qauıpsızdık – ärbır tūrǧynnyŋ kündelıktı ömır sapasyna tıkelei äser etedı. Sondyqtan bız tek talqylaumen şektelmei, naqty şeşımderge köşuımız qajet. Partiia naqty nätijege baǧyttalǧan jüielı jūmysty jalǧastyrady», – dedı ol.
Öz kezegınde deputat Ekaterina Smyşliaeva qarausyz qalǧan üiler mäselesıne toqtalyp, äkımdıkterge olardy memlekettık ūiymdar arqyly uaqytşa basqaru ökılettıgı berılgenın atap öttı. Būl – äleumettık tūrǧydan maŋyzdy şeşım.
«Jaŋa zaŋda tūrǧyn üi inspeksiiasymen jäne kommunaldyq qyzmettermen özara ıs-qimyl reglamentterı aiqyn belgılendı. Bıraq täjıribede mäseleler bar ekenın körıp otyrmyz. Osy tūrǧyda bızdıŋ joba negızgı kommunikasiialyq alaŋ bolady. Ärbır töraǧa, üidıŋ ökılı basqaruǧa qatysty mäseleler boiynşa «AMANAT» partiiasyna jügıne alady jäne qajet bolǧan jaǧdaida tiıstı qyzmettermen tıkelei bailanys ūiymdastyrylady.
Kadr mäselesı de partiianyŋ basty nazarynda. Salaǧa keletın mamandardyŋ bılıktılıgın arttyru, sertifikattau jüiesın jetıldıru jäne oqytu sapasyn arttyru – aldaǧy kezeŋnıŋ negızgı mındetterınıŋ bırı. Bız oqu jäne test materialdarynyŋ sapasyn, sondai-aq töraǧalar üşın sertifikattau qyzmetterınıŋ qoljetımdılıgın baqylau baǧytynda jūmys jürgızemız», – dedı deputat Ekaterina Smyşliaeva.
Mäjılıs deputaty Qazybek Älışev tūrǧyn üi-kommunaldyq şaruaşylyq salasyndaǧy reformalardyŋ mänın egjei-tegjeilı tüsındırdı. Onyŋ aituynşa, «Tūrǧyn üi qatynastary turaly» Zaŋdaǧy özgerıster būl salany tübegeilı jaŋǧyrtuǧa baǧyttalǧan.
Is-şara barysynda öŋırdegı tūrǧyn üi qorynyŋ naqty jaǧdaiy jäne keiıngı jyldary jürgızılgen jūmystar da aşyq aityldy. Oblysta 12 mlrd teŋge kölemınde qarjy bölınıp, 255 tūrǧyn üige jöndeu jūmysy jürgızılgen, sondai-aq 223 lift jaŋartylǧan. Būdan bölek basqaru jüiesın jaŋǧyrtu baǧytynda 331 MİB qūryldy.
