Qudaıdan da kúshti bolyp ýaqytty artqa bir saǵat syrǵyta saldyq.
Endi qys tústi. Keı óńirde kún tórtten asa batady. Besten asa qarańǵy túsedi.
Ekinshi aýysymda oqıtyn balalar mektepten jetiden asa shyǵady. Bul kez tym qarańǵy. Oqýshynyń amandyǵyna, qaýipsizdigine qıyn bop tur.
Endi ne isteımiz?
Bizde bárin sheshe salatyn bir jaman úrdis bar.
- Mektepke bala syımaı jatyr ne isteımiz?
- Sabaq ýaqytyn qysqartyp úsh aýysymdy jasańdar!
- 45 mınýtty 40 mınýtqa túsirdik. Másele «sheshildi».
- Búgin mereke ǵoı. Ne isteımiz?
- Bir eki sabaqty qysqarta salyńdar.
- Balalardyń sabaǵy bitkenshe tún bolyp ketip jatyr, ne isteımiz?
- Sabaq ýaqytyn qysqarta salyńdar!
- 40 mınýtty 30 mınýtqa túsirdik. Másele sheshildi.
- Mine, máseleniń sheshý jolyn taýyp úırenińder. Joq jerden problema týyndatpaı.
Kóp jerde máseleniń sheshý joly osylaı qalyptasty. Qazir keı mekteptiń bir akademııalyq saǵaty 45 mınýt, keı mektepte 40 mınýt. Endi myna saǵattyń jyljyǵanymen 30 mınýttyq ete salaıyq degen usynysty kórip kádimgideı shoshyp otyrmyn. Bul pedagogıkalyq ustanym, pedagogıkalyq zańdylyq qaıda?
Ótkende nege 40 mınýt degen suraǵyma bireý 5 mınýttyń ne ary berisi bar, oqıtyn bala 15 mınýtta da oqıdy depti. Eh, sóıtip oqý jylyn da kesip tastap edik.
Aınalaıyndar, oqý baǵdarlamasy josparlanǵanda ár sabaq 45 mınýtqa laıyqtalady. Ár sabaqtyń salmaǵy, júgi 45 mınýtqa arnalady. Muǵalim úshin 5 mınýt túgili 5 sekýnd ta qadirli hám qymbat. Muǵalim 5 mınýtta óte úlken máselelerdi sheship úlgeredi.
Ult ustazy Ahmet Baıtursynuly «Balalarǵa kóp úıretem dep, asyǵyp shala-sharpy úıretýden, az da bolsa, anyqtap nyq úıretý abzal» deıdi. Álde Ult ustazynyń ustanymy da oıynshyq pa?
Ýaqytty shegergen qatelikti oqýshynyń bilim alý ýaqytyn qysqartýmen sheshpeńdershi, ótinish!
Balalar, tolyq, laıyqty, sapaly bilim alý kerek!
Aıatjan Ahmetjanuly
