Tatarstanda drondardyŋ şabuylynan keiın «Kaleikino» mūnai aidau stansiiasy — «Dostyq» mūnai qūbyrynyŋ toraby örtendı. Qazaqstan öz mūnai jetkızılımderıne ziian kelmegenın mälımdedı, dep habarlaidy “Adyrna“ portaly Tengrinews.kz saityna sıltep.
23 aqpanǧa qaraǧan tünı Almetevskıde «Kaleikino» mūnai aidau stansiiasynda ört boldy. Deutsche Welle ukrain derekközderıne sılteme jasap habarlauynşa, jergılıktı tūrǧyndar bırneşe jarylys dybysyn estıgen, sodan keiın nysanda ört şyqqan.
Örttıŋ videokadrlary Telegram-arnalarynda tarady.
Almetevsk äkımşılıgınıŋ mälımetınşe, önerkäsıp aimaǧynda dron synyqtarynyŋ qūlauynan ört tūtanǧan. Bilık ökılderı zardap şekkender joq ekenın habarlady.
«Kaleikino» stansiiasy — öŋırdegı «Transneft» jüiesındegı eŋ ırı nysandardyŋ bırı. Būl – ärtürlı aimaqtardan keletın mūnai qabyldanyp, aralastyrylyp, saqtalatyn, ärı qarai magistraldyq mūnai qūbyrlary arqyly jöneltıletın basty mūnai aidau stansiiasy.
Sonyŋ ışınde mūnai Europaǧa eksporttalatyn «Dostyq» mūnai qūbyry baǧytyna da jıberıledı.
Qazaqstannyŋ Energetika ministrlıgı Tatarstandaǧy oqiǧanyŋ qazaqstandyq mūnai tasymalyna äser etpegenın mälımdedı.
«Oqiǧaǧa qatysty taraǧan aqparatqa bailanysty Energetika ministrlıgı būl jaǧdai qazaqstandyq mūnaidy tasymaldau üderısıne äser etpegenın habarlaidy. Jük jöneltuşılerden şikızatty qabyldau jäne ony magistraldyq mūnai qūbyrlary jüiesı arqyly ärı qarai aidau bekıtılgen kestege säikes ştattyq rejimde jüzege asyryluda. Qazaqstan mūnaiynyŋ tranzitı nemese eksporty boiynşa eşqandai şekteuler tırkelgen joq», delıngen habarlamada.
Qazaqstan «Kaleikino» stansiiasymen tıkelei bailanysty emes, alaida bızdıŋ mūnai sol jüie arqyly ötedı: aldymen şikızat Atyrau – Samara qūbyry arqyly Reseige jetkızıledı, sodan keiın «Transneft» magistraldyq jelısıne tüsedı. Mūnda ärtürlı öŋırlerden kelgen mūnai aralastyrylyp, baǧyttar boiynşa taratylady. Sonyŋ ışınde Europaǧa eksport üşın «Dostyq» mūnai qūbyry baǧytyna jıberıledı. «Kaleikino» — osy jüiedegı maŋyzdy toraptardyŋ bırı, sondyqtan ondaǧy kez kelgen oqiǧa teoriialyq tūrǧydan qazaqstandyq mūnai jüretın baǧyttarǧa äser etuı mümkın.
Būǧan deiın Qazaqstannyŋ Syrtqy ıster ministrlıgı 13 qaŋtarda Qara teŋız akvatoriiasynda Kaspii qūbyr konsorsiumynyŋ teŋız terminalyna baǧyt alǧan üş tankerge jasalǧan dron şabuyldaryna bailanysty alaŋdauşylyq bıldırgen edı.
Belgılı bolǧandai, 2026 jylǧy qaŋtarda KQK arqyly qazaqstandyq mūnaidy älemdık naryqtarǧa jetkızu kölemı kürt azaidy. Jöneltu kölemı josparlanǧan deŋgeiden şamamen 45 paiyzǧa tömendedı.
KQK-daǧy qiyndyqtar aiasynda Qazaqstan mūnai baǧyttaryn özgerte bastady.
