«Ädılettı jäne Progressivtı Qazaqstannyŋ Halyqtyq Konstitusiiasy üşın» jalpyūlttyq koalisiiasynyŋ müşelerı Türkıstan oblysynyŋ tūrǧyndarymen jaŋa Konstitusiianyŋ negızgı erekşelıkterın talqylady. Türlı alaŋdarda ötken kezdesulerge ziialy qauym men etnomädeni bırlestıkterdıŋ ökılderı, eŋbek ūjymdary, käsıpkerler men jastar qatysty.
Türkıstandaǧy Kongress-holl ǧimaratynda ūiymdastyrylǧan kezdesuge myŋnan astam adam qatysty. Aşyq ärı mazmūndy äŋgıme barysynda qatysuşylar öz pıkırlerın erkın bölısıp, kökeilerındegı saualdaryn qoidy. Jūrtşylyq Ata zaŋnyŋ el bolaşaǧy üşın maŋyzy, tarihi dästürler sabaqtastyǧy, qoǧamnyŋ toptasuy men eldıŋ damuyndaǧy ruhani qūndylyqtardyŋ alatyn orny turaly aitty.
Mäjılıs töraǧasy Erlan Qoşanov ǧasyrlar boiy qazaq halqynyŋ memlekettılıgı men mädeni kody qalyptasqan qasterlı meken – Türkıstanda kezdesudıŋ simvoldyq mänı bar ekenın erekşe atap öttı. Ol däl osy jerde jaŋa Konstitusiiany qabyldau jönındegı tarihi missiianyŋ maŋyzdylyǧy erekşe sezıletınıne toqtaldy.
– Jaŋa Konstitusiia der kezınde, däl uaqytynda äzırlendı dep sanaimyn. Qazırgıdei aumaly-tökpelı zamanda, qyrǧi-qabaq qatynastar beleŋ alyp tūrǧan kezeŋde būl – syn-qaterdıŋ bärıne uaqtyly berılgen jauap. Memleket basşysynyŋ strategiialyq qadamy. Būl qadam el täuelsızdıgı men tūtastyǧyn nyǧaituǧa, ışkı tūraqtylyq pen qauıpsızdıktı qamtamasyz etuge baǧyttalǧan. Olar eşqaşan özgermeitın mäŋgılık, myzǧymas konstitusiialyq qūndylyqtar retınde qarastyrylyp otyr,– dedı E.Qoşanov.
Koalisiia müşesı Jaqsybek Qūlekeev jaŋa Konstitusiiany qabyldaudyŋ tarihi maŋyzdylyǧyna nazar audardy. Ol Ata zaŋ jobasy «Qasqa jol» men «Eskı joldyŋ» jäne «Jetı jarǧynyŋ» dästürlerın jalǧai otyryp, qazaq memlekettılıgınıŋ myŋjyldyq tarihi sabaqtastyǧyna arqa süieitının aitty. Jaqsybek Qūlekeev atap ötkendei, Konstitusiianyŋ jaŋaruy – uaqyt talaby, ol eldıŋ bolaşaq tūraqty damuynyŋ kepılı boluǧa tiıs.
Ǧylym jäne joǧary bılım ministrı Saiasat Nūrbek älemnıŋ köptegen elınde demografiialyq problemalar, qūndylyqtar daǧdarysy tuyndap otyrǧanyna toqtaldy. Ol bügıngı taŋda jastar tärbiesınde sifrly platformalardyŋ yqpaly artyp kele jatqandyqtan, Ata zaŋymyzda adam kapitalyn qalyptastyruǧa, ǧylym men innovasiiany damytuǧa jäne otbasy qoldau körsetuge erekşe oryn berılgenıne män berdı.
Mäjılıs deputaty Qairat Balabiev 2023 jyly Türkıstan qalasynda ötken Ūlttyq qūryltai otyrysynyŋ «Ädılettı Qazaqstan – Adal azamat» taqyrybyna arnalǧanyna toqtaldy. Osy adal eŋbek, adamgerşılık qūndylyqtary jäne patriotizm qaǧidalary bügıngı jaŋa Konstitusiia jobasyna enıp otyr.
«Dara Ūrpaq» qoǧamdyq qorynyŋ direktory Ruhabza Qaldarbek Konstitusiia jobasyndaǧy ata-ananyŋ jauapkerşılıgı turaly normaǧa nazar audardy. Ol keide balalardyŋ jauapsyzdyǧynyŋ artynda jauapsyz ata-analar tūratynyna toqtaldy. Konstitusiia arqyly balaǧa qamqorlyq jasau men tärbie berudı ata-ananyŋ mındetı retınde bekıtu – balalardy qorǧaudyŋ maŋyzdy kepılı bolyp, köptegen äleumettık problemanyŋ aldyn aluǧa kömektesetının aitty.
Iаsaui atyndaǧy Halyqaralyq qazaq-türık universitetınıŋ Zaŋ fakultetınıŋ dekany Äliia Qasymbek jaŋa Konstitusiia jobasynyŋ adam men azamatty qorǧauǧa arnalǧan qūqyqtyq kepıldıkterdı küşeitetının atap öttı. Ol zaŋnyŋ kerı küşın qoldanuǧa bolmaityny turaly normaǧa, memlekettıŋ azamat üşın jauapty bolyp, oǧan keltırılgen ziiandy öteuge mındettı ekenı jaily baptarǧa erekşe män berdı. Būl şaralar qoǧamnyŋ memlekettık instituttarǧa degen senımın nyǧaitady degen pıkır bıldırdı.
Käsıpker Erbol Kökenov jaŋa Konstitusiia jobasymen mūqiiat tanysyp, mügedektıgı bar adamdardyŋ qūqyqtaryn qorǧauǧa baǧyttalǧan normalardy erekşe qoldaǧanyn aitty. Ol Türkıstan qalasynda aşylǧan inkliuzivtık teatrdy, onda mügedektıgı bar balalar ülken sahnada öner körsete alǧanyn mysalǧa keltırdı. Sonymen qatar Ata zaŋda bekıtılgen teŋ mümkındıkter kepıldıkterı naǧyz ädıl ärı adamgerşılıkke negızdelgen qoǧam qūruǧa yqpal etetınıne senım bıldırdı.
Odan ärı Koalisiia müşelerı etnomädeni bırlestıkterdıŋ ökılderımen döŋgelek üstelge qatysty. Türkıstan oblysy elımızdegı eŋ köpūltty öŋırlerdıŋ bırı, mūnda 50 etnos ökılderı tūrady. Sondyqtan jergılıktı tūrǧyndar tynyştyq pen tatulyqty erekşe baǧalaidy. Koalisiia müşelerı jaŋa Konstitusiiada bırtūtas Qazaqstan halqy ūǧymy qamtylǧanyn, ol etnikalyq tegıne qaramai, barlyq azamattardyŋ qūqyǧyn qorǧauǧa baǧyttalǧanyn atap öttı. Būl elımızde etnosaralyq kelısımdı nyǧaituǧa baǧyttalǧan ülken qadam. Qazaqstan halqy Assambleiasy töraǧasynyŋ orynbasary Marat Äzılhanov Assambleianyŋ rölın transformasiialap, Halyq Keŋesın qūru – azamattardyŋ memlekettık ısterge aralasuyn keŋeitetın, qoǧamdyq kelısımdı nyǧaituǧa üles qosatyn maŋyzdy jüielı şeşım ekenın atap öttı.
Sondai-aq Koalisiia müşelerı lokomotiv deposynyŋ temırjolşylarymen kezdestı. Äŋgıme tūraqty jūmys, qauıpsızdık jäne eŋbek adamyna degen qūrmettıŋ män-maŋyzyna arnaldy. Osyndai mamandar kün saiyn ekonomikanyŋ negızgı salalarynyŋ tolassyz jūmys ısteuın qamtamasyz etedı. Al jaŋa Konstitusiia memlekettık saiasattyŋ äleumettık baǧdaryn küşeitıp, azamattardyŋ eŋbek qūqyqtaryn qorǧauǧa qatysty negızgı kepıldıkterdı bekıtedı.
Sodan keiın delegasiia müşelerı «Şaǧa» industriialyq parkınıŋ jūmysymen tanysty. Käsıporyndar alaŋynda jūmysşylarmen jäne mamandarmen kezdesu ötıp, önerkäsıptıŋ damuy, käsıpkerlık jäne jaŋa jūmys oryndaryn qūru mäselelerı talqylandy. Ata zaŋǧa öndırıs pen ekonomikalyq ösım üşın qolaily, aiqyn ärı tūraqty normalar engızılgenı aityldy.
Osy künı Koalisiia müşelerı Şaǧa auylynyŋ halqymen de jüzdestı. Äŋgıme barysynda tūrǧyndar aldaǧy referendum turaly pıkırlerımen bölısıp, auyldy damytu, jūmyspen qamtu jäne äleumettık qoldau mäselelerın köterdı. Olar jaŋa Ata zaŋ balalarynyŋ jäne aimaqtyŋ bolaşaǧy üşın senımdı tırek bolatynyna senım bıldırdı.
Kezdesulerde Türkıstan oblysynyŋ tūrǧyndary jaŋa Konstitusiia zaman talaptaryna sai äzırlengenın, ol qoǧamnyŋ ädıldıkke, tärtıpke jäne tūraqtylyqqa ūmtylysyn körsetetının atap öttı. Ärbır qatysuşy 15 nauryzda referendumǧa qatysyp, jaŋa Ata zaŋdy qoldauǧa niettı ekenın bıldırdı.
Eske sala keteiık, «Ädılettı jäne Progressivtı Qazaqstannyŋ Halyqtyq Konstitusiiasy üşın» jalpyūlttyq koalisiiasy 12 aqpanda qūryldy. Onyŋ qūramyna 5 saiasi partiia men şamamen 300-ge tarta qoǧamdyq ūiym kırdı. Olar şamamen 5 million qazaqstandyqty bırıktıredı.
Jalpyūlttyq Koalisiiasynyŋ baspasöz qyzmetı
Foto: Äli Ǧalym
Daiyndaǧan: «AMANAT MEDIA GROUP» JŞS
Tapsyrys beruşı: M.J. Ospanov
«AMANAT» Partiiasy» QB qarajatynan tölendı
