Bügın Mäjılıstegı «AMANAT» partiiasy fraksiiasynyŋ keŋeitılgen jiynynda deputattar «Auyl amanaty» jobasyn jüzege asyru jönındegı Ükımettıŋ 2023 jylǧy esebın tyŋdady. Joba öz tiımdılıgın körsetude. Bügınde şamamen 80 mlrd teŋge somasyna jyldyq mölşerlemesı 2,5%-dy qūraityn 12,7 myŋ şaǧyn nesie berıldı.
Söz basynda Mäjılıs Spikerı, «AMANAT» Töraǧasy Erlan Qoşanov auyldy damytu mäselesı Memleket basşysynyŋ erekşe baqylauynda ekenın atap öttı. Osy oraida, partiia qoǧamda keŋ qoldau tapqan «Auyl amanaty» jäne «Jer amanaty» syndy ekı joba äzırledı. «Auyl amanaty» jobasy – auyldy damytudyŋ jaŋa draiverı. Jalpy alǧanda, 2029 jylǧa qarai joba aiasynda 1 mln auyl tūrǧynyn qamtyp, 350 myŋ jaŋa jūmys ornyn aşu josparlanuda. Alǧaş ret el tarihynda atalǧan maqsatqa 1 trillion teŋge kölemınde qomaqty qarajat bölındı.
«Auyl amanaty» – Prezidenttıŋ sailaualdy baǧdarlamasyna engızılgen bıregei joba. Onda auyl tūrǧyndarynyŋ tūrmysyn jaqsartudyŋ naqty ärı tüsınıktı tetıkterı qarastyrylǧan. Eŋ bastysy, qarajaty tolyq şeşılgen. Bır jyldyŋ ışınde jobanyŋ tiımdılıgın körıp otyrmyz. Barlyq memlekettık organdar men äkımdıkter «Auyl amanaty» jobasyn sapaly jüzege asyruǧa tiıs. Negızgı mındet te osy boluy kerek», – dedı ol.
Öz kezegınde, Premer-Ministrdıŋ orynbasary Tamara Düisenova «Auyl amanaty» jobasy aiasynda jūmyspen qamtylǧan azamattar sanyn arttyruǧa arnalǧan naqty josparmen bölıstı. Al Auyl şaruaşylyǧy ministrı Aidarbek Saparov fraksiia müşelerın jobanyŋ negızgı körsetkışterı turaly habardar ettı. Otyrys barysynda beine konferensiia rejimınde bırqatar öŋırdıŋ ökılderı söz alyp, jobany jergılıktı jerde jüzege asyru mäselesıne qatysty pıkır bıldırdı.
Talqylau barysynda Mäjılıs Spikerı öŋırler arasyndaǧy qarjylyq teŋgerımsızdıkke nazar audardy. Byltyr jalpy nesie somasynyŋ 43,9 mlrd teŋgesı Jambyl jäne Türkıstan oblystaryna berıldı. Alaida nebärı 1 milliard teŋge alǧan aimaqtar da bar. Sondai-aq, Erlan Qoşanov Ükımet ırı auyl şaruaşylyǧy kooperativterın qūruǧa tiıstı köŋıl bölmeitının atap öttı. Sondai-aq, ol «AMANAT» partiiasy janyndaǧy jobalyq keŋse byltyr auyl şaruaşylyǧyndaǧy jekelegen salalardyŋ ekonomikalyq baǧdary men damu äleuetın anyqtau üşın 166 audanda, 16 şaǧyn qala men 2 260 auyldyq okrugte skrining jürgızgenın eske saldy.
«Bolaşaqta barlyq kem-ketıktı eskeru qajet. Josparlanǧan körsetkışterge qol jetkızu üşın aldaǧy kezeŋde kemınde jyl saiyn 50 myŋ jūmys ornyn aşyp otyruǧa tiıspız. Qaǧaz betındegı ädemı sifrlardyŋ qajetı joq dep sanaimyn. Bastysy – jūmyssyz auyl tūrǧyndaryn tūraqty eŋbekpen qamtu», – dedı Erlan Qoşanov.
Jiyndy qorytyndylai kele, «AMANAT» Töraǧasy joba aiasynda nesie berudı sifrlandyru prosesın jedeldetudı, mal satyp alu jäne tehnikamen qamtamasyz etu mäselelerın pysyqtaudy, statistika derekterın bıryŋǧai standartqa keltırudı, sondai-aq auqymdy tüsındıru jūmysyn jürgızudı tapsyrdy. «Auyl amanaty» jobasyn jüzege asyru barysy partiia fraksiiasynyŋ erekşe baqylauynda bolady.
Is-şara aiasynda foiede Auyl şaruaşylyǧy ministrlıgı äzırlegen «Auyl amanaty» aqparattyq jüiesı tanystyryldy. Platforma «Auyl amanaty» baǧdarlamasyna onlain rejimde ötınış beruge jäne ol ötınıştıŋ jai-küiın baqylauǧa mümkındık beredı. Bügınde platforma qanatqaqty rejimde jūmys ısteidı. Biyl şıldede platforma tolyq ıske qosylady. Sondai-aq, fraksiia müşelerı «Auyl amanaty» jobasy aiasynda öndırılgen auyl şaruaşylyǧy önımderımen tanysty.
