Eńbek jáne halyqty áleýmettik qorǵaý mınıstri Tamara Dúısenova senat otyrysynan keıin jýrnalısterdiń zeınet jasyn tómendetý týraly suraǵyna jaýap berdi, dep habarlaıdy «Adyrna» ulttyq portaly.
«Biz 1998 jyly zeınetaqy júıesin reformaladyq. Soǵan saı 1998 jyldyń 1 qańtaryna deıin eńbek ótili bar azamattar ǵana memleketten eńbek zeınetaqysyn jáne qosymsha bazalyq zeınetaqyny alady. Eger zeınet jasyn tómendetsek, zeınetaqy da óte tómen bolady», - deıdi Tamara Dúısenova.
Sondaı-aq, mınıstr azamattardyń 63 jasty kútpeı-aq zeınetke erte shyǵýǵa múmkindigi baryn, el azamattaryna belgilengen merzimdi kútpeı, 50 jasta zeınetke shyǵýyna bolatynyn aıtty. Ol úshin zeınetaqy júıeńiz talapqa saı bolý kerek.
«Azamattar 1998 jyldan keıin jınaqtaýshy zeınetaqyǵa óz ýaqytynda qosylyp otyrsa, jarnasy durys bolsa, 63 emes, tipti 50 jasynda zeınetke shyǵyp ketýge múmkindigi bar dep zańda jazylyp qoıǵan. Bul er azamattarǵa ǵana emes, áıelderge de qatysty», - deıdi mınıstr.
«Adyrna» ulttyq portaly
