Atyrau oblysynyŋ polisiiasy Jangeldin auylynan jūmbaq jaǧdaida joǧalyp ketken otbasyn ızdestırıp jatyr, dep habarlaidy “Adyrna”.
Aimaqtyq "Aq Jaiyq" basylymynyŋ mälımetınşe, tört adamnan tūratyn būl otbasy turaly 2025 jyldyŋ qazan aiynan berı eşqandai habar joq. Redaksiia polisiianyŋ ızdeu jariialanǧan baǧdarlau paraǧyn da jariialaǧan.
Auyl tūrǧyndarynyŋ aituynşa, Nauryz esımdı jıgıt resmi türde polisiiaǧa aryz berılmei tūryp 5–6 ai būryn joǧalyp ketken. Ol jaqyndaryna Aqtau baǧytyna jūmysqa bara jatqanyn aitqan, alaida naqty qaida jäne kımge baratyny belgısız bolǧan. Sol ketkennen keiın onymen bailanys tolyq üzılgen.
Al qazan aiynda, körşılerdıŋ sözınşe, bükıl otbasy auyldan köşıp ketken. Auyldastaryna olar därıgerge qaralu üşın jolǧa şyqqanyn aitqan. Bıraq otbasynyŋ qai qalaǧa, qai medisinalyq mekemege barǧany belgısız. Tuystary olardyŋ baǧyty, em qabyldauy nemese qazırgı jürgen jerı turaly eşqandai naqty aqparatqa ie emes. Alaŋdauşylyqty küşeitetın jait – qyzdary Miragüldıŋ üşınşı top mügedektıgı bar.
Redaksiia anyqtaǧandai, otbasy auyldan ketkennen keiın WhatsApp messendjerı arqyly ūlynyŋ atyndaǧy bükıl üidegı maldy satqan. Alynǧan qarajat, mälımetterge süiensek, Maksot Qarabalinnıŋ jeke şotyna audarylǧan.
Auyl tūrǧyndarynyŋ aituynşa, Maksot Qarabalin de, onyŋ otbasy müşelerı de taksi qyzmetın paidalanbaǧan, qalaaralyq avtobusqa bilet te almaǧan. Būl otbasynyŋ qozǧalys baǧyty eşbır resmi türde tırkelmegenın körsetedı. Osyǧan bailanysty olardyŋ jeke kölıkpen alyp ketılgen boluy mümkın degen boljam jiı aityluda.
Otbasynyŋ joǧalǧany turaly resmi aryz polisiiaǧa 2025 jyldyŋ qaraşa aiynyŋ basynda tüsken. Alaida tuystary men auyl tūrǧyndarynyŋ aituynşa, sodan berı ızdestıru jūmystarynyŋ barysy turaly naqty aqparat berılmegen. Bır jarym aidan astam uaqyt ötse de, tört adamnyŋ taǧdyry älı belgısız.
Äleumettık jelılerde Qyzylqoǧa audanynyŋ tūrǧyndary alaŋdauşylyq pen tüsınbeuşılıkterın aşyq bıldırude. Adamdar bır otbasynyŋ tügeldei, eşbır ızsız, kuäsız jäne baǧytsyz joǧalyp ketuı qalai mümkın dep otyr. Köpşılık arasynda olardyŋ küşpen alyp ketıluı mümkın degen qauıp te jiı aityluda.
