12 maýsym kúni elimizdegi bala quqyqtary jónindegi jańa ombýdsmen bolyp taǵaıyndalǵan Dınara Zakıeva Semeıdegi órtten qaza tapqan otbasylardaǵy balalarmen kezdesti, dep jazady "Adyrna". Bul týraly ol óziniń áleýmettik jelidegi paraqshasynda jazdy.
Jańa qyzmet ıesiniń aıtýynsha balalarǵa tıisti kómek kórsetilip, mektepke deıingi balalar balabaqshaǵa ornalastyrylyp, olardyń árqaısymen áńgime órbigen. Prezıdent tapsyrmasyna sáıkes qaıtys bolǵan qyzmetkerlerdiń balalaryn oqytý, áleýmettik qoldaý, járdemaqy jáne taǵy basqa koldaý sharalary iske asyrylyp jatqanyn jazdy ol.
"2 bala anasyz qalsa, al 7 bala ákesiz qaldy. Óte aýyr. Ekeýi áli mektepke de barmaǵan, 2 jáne 5 jasta. Altaýy – mektep oqýshylary. Bireýi - ýnıversıtet stýdenti.
Balalardyń kóbi Borodýlıhına, Ýspenka, Jelezenka aýyldarynda turady. Kishkentaılary óskende kim bolǵysy keletinderin aıtty. Sál úlkenderi men jasóspirimder bolǵan jaǵdaıdyń bárin túsinip tur, ákelerimen birge ótkizgen sátterdi eske aldy.
Keshke marqum Meıramgúldiń Semeıdegi týystarynyń úıinde turyp jatqan 2 balasymen, ápkesimen kezdestik. Óte tatý otbasy eken, bir birine qoldaý tanytyp, balalarǵa barynsha jylýlyq berip, qastarynda júr.
Ápkesiniń aıtýynsha, Meıramgúl men jubaıynyń bolashaqqa degen jospary jarqyn edi. Jumystan shyǵyp, ulynyń oqýyna baılanysty Semeıge kóshýge daıyndalyp jatypty. Jumysyn, áriptesterin qımaı júrgenin de aıtypty" dep jazdy ol.
Sonymen qatar, Zakıeva qazir evakýaııalyq pýnktterde 56 bala turyp jatqanyn, olardyń bárimen sólesý jumystary júrgizilip, tıisti sharalar oryndalǵany aıtyldy.
"Adyrna" ulttyq portaly
