Jetısu oblysynyŋ ortalyǧy Taldyqorǧan qalasynda «Ǧajaiypqa tolǧan Jaŋa jyl!» atty Prezidenttık şyrşa öttı. Jaŋa jyl qarsaŋyndaǧy merekelık şaraǧa öŋırdıŋ tükpır-tükpırınen kelgen 200 bala qatysty.
Balalar üşın ertegı keiıpkerlerınıŋ, animatorlardyŋ, sirk ärtısterı men şyǧarmaşylyq ūjymdardyŋ qatysuymen äserlı şou-baǧdarlama ūiymdastyryldy. Erekşe keiıpkerlerdıŋ bırı retınde jasandy intellektıŋ kömegımen basqarylatyn robotty atap ötuge bolady. Sondai-aq türlı oiyndar, baiqaular men saiystar ötkızıldı. Balalardy kele jatqan 2026 Jaŋa jylmen Jetısu oblysynyŋ äkımı Beibıt İsabaev qūttyqtady.
«Jastar» Sport saraiynda ötken merekelık şaraǧa köpbalaly jäne az qamtylǧan otbasylardan şyqqan balalar, balalardy qoldau ortalyǧynyŋ tärbielenuşılerı, ata-anasynyŋ qamqorlyǧynsyz qalǧan balalar, erekşe bılım berudı qajet etetın balalar, sondai-aq oquda, sportta, şyǧarmaşylyqta jetıstıkke jetken jas örender şaqyryldy.
Mereke fleşmob biımen bastalyp, animatorlar men balalardyŋ körkemönerpazdar ūjymdary qatysqan teatrlandyrylǧan qoiylymmen jalǧasty.
Balalardy Memleket basşysynyŋ atynan oblys äkımı qūttyqtady:
– Būl tamaşa mereke elımızdıŋ Prezidentı Qasym-Jomart Kemelūly Toqaevtyŋ atynan ūiymdastyrylyp otyr. Prezidenttık şyrşaǧa öŋırımızdıŋ ärbır audany men qalasynan ülgılı, tärtıptı, daryndy balalar şaqyryldy. Bügın özderıŋnıŋ osy üzdıkterdıŋ qatarynda bolǧandaryŋdy maqtan tūtamyz. Oquda, önerde, sportta jaŋa jetıstıkterge jete berıŋder. Bügıngı mereke senderge mol quanyş, jarqyn äser, jyly estelık syilasyn, – degen B. İsabaev balalarǧa jaŋa jyldyq syilyqtar tabys ettı.
Prezidenttık şyrşaǧa qatysqan är bala Memleket basşysynyŋ atynan qūttyqtau hattaryn, planşetter men jaŋa jyldyq tättı syilyqtar aldy.
Merekelık şara barysynda Aiaz ata men Aqşaqar balalar üşın jaŋa jyldyq şyrşany jarqyrata jaqty. Sirk ärtısterı, animatorlar, qazaq halyq ertegılerı men multfilm keiıpkerlerı öner körsetıp, merekege erekşe reŋ berdı.
Sonymen qatar jaryq şouy ūiymdastyrylyp, türlı köŋıldı baiqaular ötkızıldı. Balalar öleŋ oqyp, än aityp, bi biledı. Merekelık şara soŋynda jas qonaqtarǧa ärtürlı dämder men tättı taǧamdar ūsynyldy.
Jaŋa jyl qarsaŋyndaǧy merekege kelgen balalar äserın bölıstı.
– Bızdıŋ otbasymyz köpbalaly, bärımız tatu tūramyz, bır-bırımızge ärdaiym kömektesemız. Qazır Qaratal audany Jetıjal orta mektebınıŋ 5-synybynda oqimyn. Sabaqta üzdıkter qataryndamyn. «Zerde» audandyq zertteu jobasynyŋ jüldegerımın, «Kenguru» ziiatkerlık oiyn baiqauynyŋ, sondai-aq «Daryn» respublikalyq ǧylymi-praktikalyq ortalyǧy ūiymdastyrǧan «Aqbota» ziiatkerlık olimpiadasynyŋ jüldegerımın. Bügıngı şyrşa merekesı köŋıldı ärı qyzyqty boldy, maǧan qatty ūnady. Barlyq dostarymdy Jaŋa jylmen qūttyqtaimyn, – dedı Köksu audany Jetıjal orta mektebınıŋ 5-synyp oquşysy Aizere Bazarbekqyzy.
«Ainalaiyn» balalardy qoldau ortalyǧynyŋ tärbielenuşısı Rüstem Qalibekov te Prezidenttık şyrşaǧa qatysuşylardy merekege orai qūttyqtady:
– Men sabaqty üzdık oqimyn, än aitqandy, akterlıktı jaqsy köremın, sportqa qyzyǧamyn. Auyr atletikadan oblys chempionymyn, «Jas sarbaz» klubynyŋ belsendı müşesımın. Jaŋa jyldy asyǧa kütıp jürmın. Bügın Prezidenttık şyrşaǧa şaqyrylǧanyma öte quanyştymyn. Aldaǧy jyly da öz armandaryma jetu üşın alǧa ūmtylamyn, – dedı ol.
Atap ötsek, osyndai merekelık şaralar öŋırdıŋ barlyq audan-qalalarynda ötkızılıp, onda taǧy 2 myŋnan astam bala qamtylmaq.
