Atyrauda segız ai boiy ızdeude bolǧan 23 jastaǧy Iаna Legkodimovanyŋ ölımıne qatysty ıstıŋ qalai aşylǧany belgılı boldy. Polisiia beinejazbalardy jariialady, dep habarlaidy "Adyrna".
IIM mälımetınşe, 23 jastaǧy Iаna Legkodimova 2024 jylǧy 18 qazannan 19-na qaraǧan tünı öltırılgen. Boijetkennıŋ denesı tek segız ai ötken soŋ Jaiyq özenınıŋ jaǧasynan tabyldy.
«Aldymen adam joǧalu faktısı boiynşa ıs tırkeldı. Habar tüsken boida bız ony ızdeuge kırıstık. Bırqatar jūmys atqaryldy. Adam ūrlanǧany jönınde mälımetter jinaqtalǧan soŋ ıstı adam ūrlau deregı boiynşa jürgızdık. Odan soŋ ıs kısı öltıru deregıne özgertıldı», - dedı Atyrau oblysy kriminaldyq polisiia basqarmasynyŋ bölım bastyǧy Erlan Qūsaiynov.
Polisiiaǧa habar 20 qazan künı qyz balanyŋ anasynan onyŋ habar-oşarsyz ketkenı jönınde tüsken. Tärtıp saqşylary Iаnanyŋ tür-sipatyna, erekşelıkterıne qarai sūrau salyp, ızdestıru jürgızgen.
«Bız onyŋ üiden şyqqan sätınen bastap jürgen baǧytyn qalpyna keltıre bastadyq. Kameralar qyz mıngen aq tüstı kölıktı körsettı. Janynda esıktı ūstap tūrǧan ekınşı er adam bolǧan. Keiın ol da avtokölıkke otyrǧan. Odan soŋ olar Taldykölge qarai baǧyt alǧan», - dedı Atyrau oblysy PD tergeu basqarmasynyŋ asa maŋyzdy ıster jönındegı tergeuşısı Temırhan Hajmūratov.
Oqiǧanyŋ jai habar-oşarsyz ketken adam turaly emes, qylmystyq sipaty baryn jedel uäkılder anyqtady. Qaladaǧy beinekameralardyŋ jazbalary qaralyp, küdıktı kölıktıŋ jüru baǧyty tekserıledı. Osylaişa qyzdy alyp ketken ekı jıgıt anyqtalady. Bırı qylmysty öz qolymen jasasa, ekınşısı oǧan ızın jasyruǧa kömektesken.
«Küdıktıler ekı künnen keiın ūstaldy. Bırı Qūrmanǧazy audanyna ketıp ülgergen, ekınşısı kölıktı juatyn orynǧa aparyp, ızderdı jäne marqūmnyŋ telefonyn joiǧan», – dedı tergeuşı Hajmūratov.
Aiǧaqtardyŋ joiyluyna qaramastan, polisiia qyzmetkerlerı ıstı aşty. Tergeu materialdaryna säikes, Hairjanov kölıktıŋ ışınde Iаnany tūnşyqtyrǧan, al dosy Katimov qyzdy qaşyp ketpesın dep esıktı ūstap tūrǧan. Būdan keiın olar denenı qala syrtyna aparyp, özenge laqtyrǧan.
«Aldymen bız Hairjanovty anyqtadyq. Onyŋ jauaby boiynşa ekınşı küdıktı Qatimovty taptyq. Küdıktıler ūstalyp, bıraq mäiıttıŋ tabylmaǧany menıŋ täjıribemde alǧaş ret boldy. Soǧan qaramastan küdıktınıŋ sözı boiynşa qylmys bolǧan oryndy anyqtadyq», – dedı Erlan Qūsaiynov.
Qylmysker men marqūm bır universitette oqyǧan jäne bırın-bırı 2022 jyldan berı bılgen. Qyz-jıgıt retınde qarym-qatynasta bolǧan. Qasköiler būryn-soŋdy sotty bolmaǧan, qandai da bır esepte tūrmaǧan. Jedel uäkıldıŋ aiytuynşa, mūndai jaǧdailarda ūsaq-tüiektıŋ özın eskeru maŋyzdy.
«Qylmys tırkelgen uaqytta jedel uäkıl ūsaq tüiek män-jailarǧa nazar audarady. Ony eskermeseŋ, qylmys aşylmai qaluy mümkın. Adamnyŋ söilegenıne nazar audaramyz. Psihologiialyq jaǧdaiyna män beremız. Küdıktını söiletuge tyrysamyz», – deidı jedel uäkıl.
Qylmystyŋ jasaluyna Iаnanyŋ Hairjanovtyŋ basqa qyzben kezdesıp jürgenın jäne oǧan üilenbek ekenın bılıp qoiuy, qalyŋdyǧyna şyndyqty aitamyn dep oqtaluy türtkı bolǧan.
Tergeuşınıŋ aituynşa, basty küdıktı äuelde tergeudı şatastyruǧa tyrysqan. Alaida tärtıp saqşylary taktikany özgertıp, qylmyskerdıŋ jauapkerşılıkten jaltaruyna jol bermedı.
«Sot sanksiiasy boiynşa bız olardyŋ paraqşalaryn tekserdık. Hat almasu barysynda olar kısı öltıru josparyn talqylaǧan. Sondai-aq ǧalamtordaǧy ızdeu jüiesınde Qazaqstanda adam öltıru üşın qandai jauapkerşılık qarastyrylatyny jäne beinebaqylau kameralaryndaǧy jazbalar qanşa uaqyt saqtalatyny turaly sūraqtar bolǧan», – dedı tergeuşı Temırhan Hajmūratov.
Polisiia qyzmetkerlerı barlyq qajettı prosestı jürgızıp, däleldemelerdı jinaqtady. Bügınde qos küdıktı de jauapqa tartyldy. Ekeuı de ömır boiyna bas bostandyǧynan aiyryldy.
