Jurnalist Äset Mataev Qazaqstan prezidentı Qasym-Jomart Toqaevtyŋ atyna aşyq hat joldady, dep habarlaidy "Adyrna" ūlttyq portaly.
QazTAG mälımetınşe, aşyq hatta Ekıbastūzda aşylǧan jaŋa ferrosilisium öndırısınıŋ memlekettık qarjylandyryluy men jobaǧa Nyǧmatullin äuletınıŋ qatysuyna alaŋdauşylyq bıldırılgen.
Mataevtyŋ aituynşa, 24.KZ arnasyndaǧy jaŋalyqtar siujetınde Pavlodar oblysynyŋ äkımı Asaiyn Baihanov pen būrynǧy deputat Erlan Nyǧmatullin aşqan öndırıs memlekettık qoldaumen jüzege asqan. Aşyq derekterge süiensek, qūny 92,2 mlrd teŋgenı qūraityn zauyttyŋ 80 paiyzy (72 mlrd teŋge) Qazaqstannyŋ damu bankı arqyly qarjylandyrylǧan.
Jurnalist būl jaǧdaidy «Ädılettı Qazaqstan» ideiasymen salystyra otyryp, ekonomikalyq jäne saiasi resurstardyŋ älı de sanauly äuletter qolynda şoǧyrlanyp otyrǧanynyŋ belgısı dep baǧalaidy.
«Ökınışke qarai, sol 166 otbasynyŋ köbı älı künge deiın Qazaqstandy basqaryp otyr. Olardyŋ qatarynda Nyǧmatullinder otbasy da bar. Halyq olardy kezınde Qaraǧandy öŋırınıŋ beiresmi ielerı atady», – deidı Mataev.
Ol hatynda öz otbasynyŋ Nyǧmatullindermen aradaǧy janjalynan keiın bastan ötkergen qysym, qudalau, mülıktı joǧaltu jäne densaulyqtyŋ naşarlauyna alyp kelgen oqiǧalardy da egjei-tegjeilı baiandaǧan. Mataevtyŋ aituynşa, olardyŋ ısı 2022 jylǧa deiın ılgerılemegen, sebebı bilık qūrylymynda būrynǧy yqpaldy toptardyŋ ökılderı otyrǧan.
«2022 jyldyŋ şıldesınde bız tolyq aqtaldyq, memleket atynan resmi türde keşırım sūraldy. Europarlament pen EQYŪ bızdıŋ ısımızdı saiasi ıs dep tanydy»,- dep jazady ol.
Sonymen bırge jurnalist özınıŋ Prezidentke ündeuınıŋ jeke renışten tuyndamaǧanyn, qoǧamdaǧy ädılettılıkke degen senımnıŋ älsıreuıne alaŋdaudan tuǧanyn atap ötedı.
