Äleumettık jelıde erekşe balalardy emdeitın ortalyq qyzmetkerınıŋ kışkentai qyz balany qinap jatqan videosy tarady, dep habarlaidy «Adyrna» tılşısı.
Oqiǧa Ekıbastūz qalasynda bolǧan. Instagram-daǧy «Tipichnyi Pavlodar» paraqşasynyŋ jazuynşa, būl oqiǧa turaly zardap şekken qyzdyŋ anasynyŋ qūrbysy aityp bergen.
«Beiımde dene tärbiesı sabaǧy kezınde qūrbymnyŋ qyzy jaraqat alyp, sonyŋ saldarynan qolyna gips salyndy. Būl jaraqatqa qyzmetkerdıŋ qatygez äreketterı sebep bolyp otyr dep sanaimyz. Onyŋ bärı kamera aldynda bolǧan. Er adam balaǧa dörekılık tanytqan. Balada damu keşeuıldıgı bar, sondyqtan ol ata-anasyna ne bolyp jatqanyn aita almaidy. Osy uaqytqa deiın jattyqtyruşy da, ortalyq basşylyǧy da būl oqiǧa üşın keşırım sūraǧan joq», — dedı äiel.
Būl oqiǧaǧa Pavlodar oblysy boiynşa Balalardyŋ qūqyqtaryn qorǧau jönındegı öŋırlık uäkıl Säule Şakenova pıkır bıldırıp, Qylmystyq kodekstıŋ 140-baby 2-bölıgı boiynşa ıs qozǧalǧanyn mälımdedı.
«Barlyq beinejazbalar tärkılenıp, sotqa deiıngı tergeu aiasynda mūqiiat zertteledı. Qazırgı uaqytta QR Qylmystyq kodeksınıŋ 140-baby 2-bölıgı boiynşa qylmystyq ıs qozǧaldy. Balanyŋ anasymen bailanystamyn. Bala bırtındep öz-özıne kelıp jatyr, onyŋ psiho-emosiialyq jaǧdaiy tūraqtalyp keledı», - dedı ol.
Ekıbastūz qalasy äkımdıgı de sotqa deiıngı tergeudıŋ jürıp jatqanyn habarlady.
