الەۋمەتتىك جەلىدە ەرەكشە بالالاردى ەمدەيتىن ورتالىق قىزمەتكەرىنىڭ كىشكەنتاي قىز بالانى قيناپ جاتقان ۆيدەوسى تارادى، دەپ حابارلايدى «ادىرنا» ءتىلشىسى.
وقيعا ەكىباستۇز قالاسىندا بولعان. Instagram-داعى «تيپيچنىي پاۆلودار» پاراقشاسىنىڭ جازۋىنشا، بۇل وقيعا تۋرالى زارداپ شەككەن قىزدىڭ اناسىنىڭ قۇربىسى ايتىپ بەرگەن.
«بەيىمدە دەنە تاربيەسى ساباعى كەزىندە قۇربىمنىڭ قىزى جاراقات الىپ، سونىڭ سالدارىنان قولىنا گيپس سالىندى. بۇل جاراقاتقا قىزمەتكەردىڭ قاتىگەز ارەكەتتەرى سەبەپ بولىپ وتىر دەپ سانايمىز. ونىڭ ءبارى كامەرا الدىندا بولعان. ەر ادام بالاعا دورەكىلىك تانىتقان. بالادا دامۋ كەشەۋىلدىگى بار، سوندىقتان ول اتا-اناسىنا نە بولىپ جاتقانىن ايتا المايدى. وسى ۋاقىتقا دەيىن جاتتىقتىرۋشى دا، ورتالىق باسشىلىعى دا بۇل وقيعا ءۇشىن كەشىرىم سۇراعان جوق»، — دەدى ايەل.
بۇل وقيعاعا پاۆلودار وبلىسى بويىنشا بالالاردىڭ قۇقىقتارىن قورعاۋ جونىندەگى وڭىرلىك ۋاكىل ساۋلە شاكەنوۆا پىكىر ءبىلدىرىپ، قىلمىستىق كودەكستىڭ 140-بابى 2-بولىگى بويىنشا ءىس قوزعالعانىن مالىمدەدى.
«بارلىق بەينەجازبالار تاركىلەنىپ، سوتقا دەيىنگى تەرگەۋ اياسىندا مۇقيات زەرتتەلەدى. قازىرگى ۋاقىتتا قر قىلمىستىق كودەكسىنىڭ 140-بابى 2-بولىگى بويىنشا قىلمىستىق ءىس قوزعالدى. بالانىڭ اناسىمەن بايلانىستامىن. بالا بىرتىندەپ ءوز-وزىنە كەلىپ جاتىر، ونىڭ پسيحو-ەموتسيالىق جاعدايى تۇراقتالىپ كەلەدى»، - دەدى ول.
ەكىباستۇز قالاسى اكىمدىگى دە سوتقا دەيىنگى تەرگەۋدىڭ ءجۇرىپ جاتقانىن حابارلادى.
