Ekibastuzdan Maıqaıyń kentine aýyzsý jetkizetin úlken qubyr jaryldy. Bul týraly Pavlodar oblysy ákiminiń baspasóz qyzmeti málimdedi, dep habarlaıdy “Adyrna” ulttyq portaly.
Aqaý dıametri 1020 mm-lik qubyrdan shyqqan. Qazir kentti aýyzsýmen jabdyqtaý tómen qysymda júrgizilip jatyr.
«21 aqpan kúni Baıanaýyl aýdanynyń Maıqaıyń kentine dıametri 1020 mm sýyq sýmen jabdyqtaý qubyrynda aqaý anyqtaldy. Aqaýdyń ýchaskesi «Ekibastuz qalalyq sý arnasy» MKK ekinshi kótergish sorǵysynan 27 km qashyqtyqta ornalasqan. Oqıǵa ornyna óńir basshysy Asaıyn Baıhanov, Ekibastuz qalasynyń jáne Baıanaýyl aýdanynyń basshylary, sondaı-aq, oblystyq TJD basshysy baryp, jedel shtab uıymdastyryldy. Aqaýdyń sebebin anyqtaý jáne joıý jumystary «Ekibastuz qalalyq sý arnasy» MKK kúshterimen júrgizilip jatyr. Jóndeý jumystaryna 30 adam jáne 10 birlik mamandandyrylǵan tehnıka jumyldyryldy. Sondaı-aq, oqıǵa ornynda Pavlodar oblysy TJD jáne «Maıqaıyńaltyn» AQ mamandary jumys isteýde», dep málimdedi óńir ákiminiń baspasóz qyzmeti.
Sondaı-aq, Maıqaıyń kentiniń aýyzsý tutynýshylary sýdan ajyratylǵan joq. Sýmen jabdyqtaý tómen qysymda júrgizilip otyr.
Aıta keteıik, Ekibastuz ben Maıqaıyń kenti aralyǵyndaǵy qubyrdyń uzyndyǵy — shamamen 28-30 km.
