19 qazan künı Orynbor oblysyndaǧy gaz öŋdeitın zauytqa (GÖZ) pilotsyz ūşu apparattary (drondar) şabuyl jasady. Būl turaly öŋır basşysy Denis Solnsev Telegram-arnasynda jariialady, dep habarlaidy “Adyrna”.
Gubernatordyŋ mälımetınşe, drondar öŋırdegı taǧy bır önerkäsıptık nysandy da nysanaǧa alǧan, alaida naqty qai käsıporyn ekenı aitylmady.
"Şabuyl nätijesınde zauyttyŋ bır sehynda ört şyqty. Oqiǧa ornyna barlyq şūǧyl qyzmetter jūmyldyryldy. Örttı söndıru jūmystaryn Tötenşe jaǧdailar ministrlıgınıŋ bölımşelerı jäne Orynbor oblysynyŋ tötenşe jaǧdailar jüiesı jürgızıp jatyr. Qyzmetkerler arasynda zardap şekkender joq. Zauyt maŋyndaǧy eldı mekenderge qauıp tönıp tūrǧan joq", – dedı Denis Solnsev.
Orynbor qalasynda ornalasqan gaz öŋdeu zauyty "Gazprom öŋdeu" qūramyna kıredı jäne Orynbor gaz-himiia keşenınıŋ bır bölıgı. Käsıporyn tabiǧi gaz ben gaz kondensatyn tereŋ öŋdeumen ainalysady. Şikızattyŋ bır bölıgı Qazaqstandaǧy Qaraşyǧanaq ken ornynan jetkızıledı.
Zauyt kelesı tabiǧi janǧyş gaz, tūraqty gaz kondensaty, elementarly kükırt, sūiytylǧan kömırsutek gazdary (SQG), gaz benzinı jäne basqa kömırsutekter jäne taǧy basqa önım türlerın şyǧarady.
Sonymen qatar, būl käsıporyn – Reseidegı tabiǧi gazǧa iıs beretın odorantty öndıretın jalǧyz zauyt.
Zauyt jylyna 45 mlrd tekşe metrge deiın şikı gaz, jäne 3,6 mln tonna tūraqty kondensat öŋdeuge qauqarly.
Orynbor gaz öŋdeu zauyty tehnologiialyq tūrǧydan gelii zauytymen bailanysty. Aldymen gaz GÖZ-de öŋdelıp, keiın gelii zauytynda gelii men basqa da qūndy komponentter bölınıp alynady. Būl – Reseidıŋ europalyq bölıgındegı gelii öndıretın jalǧyz ırı käsıporyn. Ol jylyna 15 mlrd tekşe metr gaz öŋdep, 7,5 mln tekşe metrge deiın gelii öndıre alady.
Resei Qorǧanys ministrlıgınıŋ mälımetınşe, 18 qazan saǧat 23:00-den 19 qazan 07:00-ge deiıngı aralyqta eldıŋ är aimaǧynda 45 pilotsyz ūşu apparaty joiylǧan.
Qazır Reseilık zauyt Qaraşyǧanaq ken ornynan gaz qabyldaudy toqtatty.
«Gazprom» JAQ-tyŋ mälımetınşe, 2025 jylǧy 19 qazanda Orynbor gaz öŋdeu zauytynda ūşqyşsyz ūşu apparattarynyŋ (ŪŪA) şabuyly saldarynan apatty jaǧdai oryn aldy. Soǧan bailanysty zauyt Qaraşyǧanaq ken ornynan şikı gaz qabyldaudy uaqytşa toqtatty. Resei tarapy zauyttaǧy zaqymnyŋ sipaty men jūmysyn qalpyna keltıru merzımı turaly aqparatty äzırge ūsynǧan joq», — dedı Qazaqstan Energetika ministrınıŋ keŋesşısı, ministrlıktıŋ resmi ökılı Äsel Serıkpaeva.
Onyŋ aituynşa, Qazaqstandaǧy gazben qamtu jüiesı qalypty jūmys ısteude.
«Işkı tūtynuşylarǧa gaz ştattyq rejimde jetkızılude, eşqandai şekteu joq. Qaraşyǧanaq şikızatyn öŋdeuge jäne būl jaǧdaidyŋ mūnai öndıruge yqtimal äserıne qatysty mäseleler jer qoinauyn paidalanuşylarmen bırlesıp talqylanuda. Mümkın bolatyn şyǧyndar men aldaǧy ıs-qimyldarǧa qatysty aqparat qosymşa habarlanatyn bolady. Energetika ministrlıgı jaǧdaidy baqylauda ūstap otyr jäne reseilık tarappen ärı ken orny operatorlarymen tūraqty bailanysta», — dep qosty Serıkpaeva.
Aita keteiık, Orynbor qalasy Qazaqstanmen şekaraǧa jaqyn ornalasqan — şamamen 120 km qaşyqtyqta.
