19 قازان كۇنى ورىنبور وبلىسىنداعى گاز وڭدەيتىن زاۋىتقا (گوز) پيلوتسىز ۇشۋ اپپاراتتارى (دروندار) شابۋىل جاسادى. بۇل تۋرالى ءوڭىر باسشىسى دەنيس سولنتسەۆ Telegram-ارناسىندا جاريالادى، دەپ حابارلايدى “ادىرنا”.
گۋبەرناتوردىڭ مالىمەتىنشە، دروندار وڭىردەگى تاعى ءبىر ونەركاسىپتىك نىساندى دا نىساناعا العان، الايدا ناقتى قاي كاسىپورىن ەكەنى ايتىلمادى.
"شابۋىل ناتيجەسىندە زاۋىتتىڭ ءبىر تسەحىندا ءورت شىقتى. وقيعا ورنىنا بارلىق شۇعىل قىزمەتتەر جۇمىلدىرىلدى. ءورتتى ءسوندىرۋ جۇمىستارىن توتەنشە جاعدايلار مينيسترلىگىنىڭ بولىمشەلەرى جانە ورىنبور وبلىسىنىڭ توتەنشە جاعدايلار جۇيەسى جۇرگىزىپ جاتىر. قىزمەتكەرلەر اراسىندا زارداپ شەككەندەر جوق. زاۋىت ماڭىنداعى ەلدى مەكەندەرگە قاۋىپ ءتونىپ تۇرعان جوق", – دەدى دەنيس سولنتسەۆ.
ورىنبور قالاسىندا ورنالاسقان گاز وڭدەۋ زاۋىتى "گازپروم وڭدەۋ" قۇرامىنا كىرەدى جانە ورىنبور گاز-حيميا كەشەنىنىڭ ءبىر بولىگى. كاسىپورىن تابيعي گاز بەن گاز كوندەنساتىن تەرەڭ وڭدەۋمەن اينالىسادى. شيكىزاتتىڭ ءبىر بولىگى قازاقستانداعى قاراشىعاناق كەن ورنىنان جەتكىزىلەدى.
زاۋىت كەلەسى تابيعي جانعىش گاز، تۇراقتى گاز كوندەنساتى، ەلەمەنتارلى كۇكىرت، سۇيىتىلعان كومىرسۋتەك گازدارى (سقگ), گاز بەنزينى جانە باسقا كومىرسۋتەكتەر جانە تاعى باسقا ءونىم تۇرلەرىن شىعارادى.
سونىمەن قاتار، بۇل كاسىپورىن – رەسەيدەگى تابيعي گازعا ءيىس بەرەتىن ودورانتتى وندىرەتىن جالعىز زاۋىت.
زاۋىت جىلىنا 45 ملرد تەكشە مەترگە دەيىن شيكى گاز، جانە 3,6 ملن توننا تۇراقتى كوندەنسات وڭدەۋگە قاۋقارلى.
ورىنبور گاز وڭدەۋ زاۋىتى تەحنولوگيالىق تۇرعىدان گەلي زاۋىتىمەن بايلانىستى. الدىمەن گاز گوز-دە وڭدەلىپ، كەيىن گەلي زاۋىتىندا گەلي مەن باسقا دا قۇندى كومپونەنتتەر ءبولىنىپ الىنادى. بۇل – رەسەيدىڭ ەۋروپالىق بولىگىندەگى گەلي وندىرەتىن جالعىز ءىرى كاسىپورىن. ول جىلىنا 15 ملرد تەكشە مەتر گاز وڭدەپ، 7,5 ملن تەكشە مەترگە دەيىن گەلي وندىرە الادى.
رەسەي قورعانىس مينيسترلىگىنىڭ مالىمەتىنشە، 18 قازان ساعات 23:00-دەن 19 قازان 07:00-گە دەيىنگى ارالىقتا ەلدىڭ ءار ايماعىندا 45 پيلوتسىز ۇشۋ اپپاراتى جويىلعان.
قازىر رەسەيلىك زاۋىت قاراشىعاناق كەن ورنىنان گاز قابىلداۋدى توقتاتتى.
«گازپروم» جاق-تىڭ مالىمەتىنشە، 2025 جىلعى 19 قازاندا ورىنبور گاز وڭدەۋ زاۋىتىندا ۇشقىشسىز ۇشۋ اپپاراتتارىنىڭ (ۇۇا) شابۋىلى سالدارىنان اپاتتى جاعداي ورىن الدى. سوعان بايلانىستى زاۋىت قاراشىعاناق كەن ورنىنان شيكى گاز قابىلداۋدى ۋاقىتشا توقتاتتى. رەسەي تاراپى زاۋىتتاعى زاقىمنىڭ سيپاتى مەن جۇمىسىن قالپىنا كەلتىرۋ مەرزىمى تۋرالى اقپاراتتى ازىرگە ۇسىنعان جوق»، — دەدى قازاقستان ەنەرگەتيكا ءمينيسترىنىڭ كەڭەسشىسى، مينيسترلىكتىڭ رەسمي وكىلى اسەل سەرىكپاەۆا.
ونىڭ ايتۋىنشا، قازاقستانداعى گازبەن قامتۋ جۇيەسى قالىپتى جۇمىس ىستەۋدە.
«ىشكى تۇتىنۋشىلارعا گاز شتاتتىق رەجيمدە جەتكىزىلۋدە، ەشقانداي شەكتەۋ جوق. قاراشىعاناق شيكىزاتىن وڭدەۋگە جانە بۇل جاعدايدىڭ مۇناي وندىرۋگە ىقتيمال اسەرىنە قاتىستى ماسەلەلەر جەر قويناۋىن پايدالانۋشىلارمەن بىرلەسىپ تالقىلانۋدا. مۇمكىن بولاتىن شىعىندار مەن الداعى ءىس-قيمىلدارعا قاتىستى اقپارات قوسىمشا حابارلاناتىن بولادى. ەنەرگەتيكا مينيسترلىگى جاعدايدى باقىلاۋدا ۇستاپ وتىر جانە رەسەيلىك تاراپپەن ءارى كەن ورنى وپەراتورلارىمەن تۇراقتى بايلانىستا»، — دەپ قوستى سەرىكپاەۆا.
ايتا كەتەيىك، ورىنبور قالاسى قازاقستانمەن شەكاراعا جاقىن ورنالاسقان — شامامەن 120 كم قاشىقتىقتا.
