Qaraǧandy oblysynda körnektı ǧalym, akademik Evnei Arystanūly Böketovtıŋ 100 jyldyq mereitoiy keŋ kölemde atap ötıldı. Evnei Böketov esımı berılgen Qaraǧandy ūlttyq zertteu universitetınıŋ bazasynda «E. A. Böketovtıŋ ǧylymi kökjiekterı» atty halyqaralyq ǧylymi konferensiia öttı. Forumǧa aldyŋǧy qatarly ǧalymdar, qoǧam qairatkerlerı men şeteldık qonaqtar qatysyp, Evnei Böketov tūlǧasynyŋ jäne onyŋ eŋbegınıŋ halyqaralyq maŋyzdylyǧyn atap öttı.
Jyl boiy Evnei Arystanūlynyŋ 100 jyldyǧyna arnalǧan türlı şaralar ūiymdastyryldy. Sonyŋ ışınde AQŞ-taǧy Djordj Vaşington universitetınde ötken Böketov künı erekşe oryn aldy. Al Qaraǧandydaǧy konferensiia osy auqymdy baǧdarlamaǧa qorytyndy boldy.
Konferensiia bastalar aldynda oblys äkımı men qonaqtar akademik Böketovtyŋ eskertkışıne gül şoktaryn qoidy.
Memleket basşysy Qasym-Jomart Toqaevtyŋ qūttyqtau hatyn konferensiia qatysuşylaryna Qaraǧandy oblysynyŋ äkımı Ermaǧanbet Bölekpaev jetkızdı. Prezident forumnyŋ aşyluymen qūttyqtap, Evnei Böketovtyŋ 100 jyldyǧyna arnalǧan halyqaralyq jiynda ǧalymnyŋ esımın mäŋgı este qaldyruǧa jäne onyŋ bai mūrasyn saqtauǧa qatysty mazmūndy oilar men ūsynystar aitylatynyna senım bıldırdı.
– Osy oqu ornynyŋ tülegı retınde mūndai maŋyzdy şaraǧa qatysyp otyrǧanyma quanyştymyn. Şyn mänınde auqymdy oilaityn tūlǧa negızın qalaǧan universitettıŋ bolaşaqqa senımmen qaraitynyn köru – erekşe sezım. Būl mūrany saqtap, damytuǧa atsalysyŋyzdar. Bılımge degen qūştarlyqtaryŋyz sarqylmasyn, ärqaşan jandaryŋyzdan qoldau körsetıp, şabyt beretın jandar tabylsyn! – dedı Ermaǧanbet Bölekpaev.
Forum jūmysyna Senat pen Mäjılıs deputattary, Qazaqstan halqy Assambleiasynyŋ ökılderı, elımızdıŋ jetekşı joǧary oqu oryndarynyŋ ǧalymdary men rektorlary, sondai-aq şeteldık qonaqtar qatysty.
Ǧalymnyŋ qyzy Aqsūlu Böketova äkesın eske alyp, estelıkterımen bölıstı:
– Evnei Arystanūly Himiia-metallurgiia institutyn basqarǧan kezde janynan bır top üzeŋgılesterın jinady. Onyŋ köptegen şäkırtterı ūzaq ǧūmyr keşıp, ǧylymi äleuetın arttyrdy, bıraq bärı ony ūmytpai, qūrmetpen eske alady. Taŋǧalarlyǧy, ol 1972 jyly taŋdaǧan kadrlar älı künge deiın osy jerde eŋbek etude. Äkem tek ǧalym ǧana emes, meiırımdı äke de boldy. Ömırdıŋ eŋ kürdelı sätterınde de äzıl-qaljyŋynan ainyǧan emes, – dedı Aqsūlu Böketova. – Bügıngı konferensiianyŋ ärbır qatysuşysy öz ideialaryn damytu üşın quatty serpın alsyn dep tıleimın.
Konferensiia barysynda akademik turaly köptegen jyly sözder aityldy.
– Ata-babamyz ärdaiym bılım men ǧylym – qoǧamnyŋ qozǧauşy küşı dep sanaǧan. Osyndai ız qaldyrǧan tūlǧa qūrmetke laiyq. Onyŋ ǧylymi jaŋalyqtary men ömırlık ūstanymy jastardy tärbieleude, äsırese esımı berılgen universitet studentterı üşın, ülken ülgı bolyp qala bermek, – dedı Mäjılıs deputaty Qūdaibergen Beksūltanov.
Plenarlyq otyrysta Evnei Böketovtyŋ jetı tomdyq şyǧarmalar jinaǧy men estelık mereitoilyq moneta tanystyryldy.
Konferensiiada üş baǧyt boiynşa ǧylymi baiandamalar oqyldy: himiia, metallurgiia jäne tehnologiia salasyndaǧy zertteuler; ädebi-publisistikalyq mūra; Böketovtyŋ gumanitarlyq jäne äleumettık ǧylymdardaǧy qoǧam qairatkerı retındegı rölı.
Evnei Arystanūly Böketov tarihta metallurg-ǧalym, KSRO Memlekettık syilyǧynyŋ laureaty, Qaraǧandy memlekettık universitetınıŋ tūŋǧyş rektory, jazuşy jäne audarmaşy retınde qaldy. Onyŋ esımı universitetke ǧana emes, eldı mekenderdegı köşelerge de berılgen. Ǧalymnyŋ bai ǧylymi jäne mädeni mūrasy bügıngı ǧylym men qoǧamǧa älı de zor yqpal etıp keledı.
