Qaraǧandy oblysynyŋ auyldyq mektepterınde erekşe qajettılıkterı bar balalardyŋ oqyp, damuyna jaǧdai jasaluda. Nūra audanyndaǧy Ybyrai Altynsarin atyndaǧy tırek mektebınde inkliuzivtı bılım beru kabinetı jaŋǧyrtudan öttı. Endı mūnda zamanaui jabdyqtar, arnaiy aimaqtar jäne erekşe bılım aludy qajet etetın balalardyŋ äleuetın aşuǧa kömektesetın käsıbi mamandar toby bar.
Kabinet mektepte bırneşe jyldan berı jūmys ıstep keledı. Onda bılıktı mamandar qyzmet atqarady: ekı psiholog, logoped, defektolog, äleumettık pedagog jäne pedagog-assistent. Olar tüzetu jäne damytu sabaqtaryn jürgızıp, balalardyŋ äleumettenuıne kömektesedı. Qazır mektepte 526 oquşy oqidy, olardyŋ 13-ı PMPK qorytyndysy boiynşa beiımdelgen baǧdarlamalardy meŋgerude. Jaŋǧyrtylǧan kabinet olar üşın oqu men qarym-qatynasta basty tırek bolady.
Jöndeuden keiın kabinet tört aimaqqa bölındı: jeke jäne toptyq sabaqtarǧa arnalǧan bölme, relaksasiiaǧa arnalǧan sensorlyq aimaq, motorikany damytuǧa baǧyttalǧan didaktikalyq modulder jäne qūmdy jaryq üstelı men taktildı ūiaşyqtary bar aimaq. Äleumettık pedagogqa arnalǧan jūmys orny da jeke jabdyqtaldy: mūnda zamanaui monoblok, printer jäne ädıstemelık materialdar bar.
— İnkliuzivtı bılım beru keŋıstıgın qūru jäne damytu — būl är balanyŋ jeke erekşelıkterıne qaramastan özın qabyldanǧan, tüsınılgen jäne qajet sezınetın bolaşaǧyna qosqan üles, — deidı mektep direktory Tatiana Iýngenştein. — Memleket pen bılım beru ūiymdarynyŋ qoldauy bılımdı barşaǧa qoljetımdı etuge mümkındık beredı.
Mekteptegı inkliuzivtı ortanyŋ damuy «Qazaqstan halqyna» qorynyŋ auyldyq jerlerdegı tırek mektepterdı damytu jobasy aiasynda jüzege asty.
Baǧdarlama şeŋberınde bılım ordasy 250 million teŋgege zamanaui jabdyqpen qamtamasyz etıldı. İnkliuziia kabinetıne qosa, mektepte STEM-zerthana, robototehnika, fizika jäne himiia kabinetterı jaŋa zerthanalarymen aşyldy, akt jäne sport zaldary men mektepke deiıngı daiarlyq kabinetterı jaŋartyldy.
Mektep sonymen qatar Nūra audanyndaǧy basqa da bılım beru ūiymdary üşın resurstyq ortalyq qyzmetın atqarady: mūndaǧy mamandar erekşe bılım aludy qajet etetın balalar men olardyŋ ata-analaryna keŋes beredı, ädıstemelık äzırlemelermen bölısedı.
Mūǧalımder inkliuzivtı bılım beru boiynşa bılıktılıgın arttyryp, erekşe balalarmen jūmys ısteudıŋ zamanaui ädısterın engızude. Būl qala men auyl mektepterı arasyndaǧy alşaqtyqty azaituǧa mümkındık beredı.
