5 qyrküiek – Qazaqstan halqy tılderı künı. Būl mereke halyqtar arasyndaǧy dostyq pen tatulyqtyŋ, tıl bailyǧynyŋ maŋyzyn aişyqtaidy. Osyndai qūndylyqtardy boiyna sıŋırgen, bes türkı tılderın jetık meŋgergen qatardaǧy Vladimir Kopylov QR IIM Ūlttyq ūlanynyŋ 5571 äskeri bölımı sapynda qyzmet etıp jür.
Ūlty – orys bolsa da, Vladimir qazaq tılın jetık bılıp qana qoimai, özbek, qyrǧyz, ūiǧyr jäne tatar tılderınde erkın söileidı. Ūlttyq ūlan qataryna Şymkent qalasynan şaqyrylǧan Vladimirdıŋ tıl bıluge degen qyzyǧuşylyǧy bala kezınen qalyptasqan. Ol türkı älemınıŋ tılderın meŋgerudı maqsat tūtqan. «Armanym – barşa türkı tılderınde söilep, ūlttar arasyndaǧy dostyqty nyǧaitu», – deidı özı.
Aita ketsek, Vladimir türkı tılderınıŋ ışındegı sirek qoldanylatyn qaraşai, qaraqalpaq jäne noǧai tılderınde söilei alady.
Tıl bıludıŋ paidasyn ūlandyq kündelıktı qyzmet barysynda sezınedı. Ol üşın patruldık qyzmette Almaty şahary tūrǧyndarynyŋ qauıpsızdıgın qamtamasyz etu de, türlı ūlt ökılderımen tıl tabysu da eş kedergı keltırmeidı. Qazaqqa – qazaqşa, özbekke – özbekşe, ūiǧyrǧa – ūiǧyrşa jauap berıp tūrǧan Vladimirdı körgende, qarulastary da taŋdai qaǧady.
Tek tıl bılımımen ǧana emes, önerımen de erekşelenetın Vladimir rotadaǧy eŋ belsendı, äskeri qyzmettıŋ üzdık sarbazdarynyŋ bırı. Qarulastary şaşyn qidyrǧysy kelse, Vladimirge barady, sebebı ol naǧyz şeber şaştaraz. Odan bölek äskeri bölımnıŋ mobilografy. Kündelıktı qyzmettı, jauyngerlık ömırdıŋ qyzyqty sätterın beinege tüsırıp, äskeri bölımnıŋ äleumettık jelıdegı imidjın qalyptastyryp jür.
Ūlttyq ūlan bügınde naǧyz talanttar ordasyna ainalyp ülgerdı. Qūqyqtyq tärtıp äskerınıŋ är bölımınde osyndai segız qyrly, bır syrly sarbazdar saqşylarmen bırlesıp elımızdıŋ 21 qalasynda qoǧamdyq tärtıptı qadaǧalaidy.
