Sabaq bastaldy. Almaty jasaryp kettı. Işı bos bolyp jüretın avtobus, trolleibusqa mınerde sony bırden bılesıŋ.
Keşe "Qazpoştaǧa" baraiyn dep 16-şy avtobusqa mındım. Ekıden keiıngı kez. Işı tola jastar. Terezege jaqyndai berıp edım, jas kelınşek oryndyqtaǧy tört-bes şamasyndaǧy balasyn tūrǧyzyp, "otyryŋyz" dedı.
Qazaqy, tärbielı jan ekenı sözınen de bılındı.
- Ainalaiyn, oryn osy balanıkı ǧoi, -dedım.
- Bız qazır tüsemız, - dedı.
- Onda otyraiyn, - dep otyrdym.
Endı jäi otyramyn ba, jybyrlap janymdaǧy türegep tūrǧan qara balanyŋ ösıŋkırep ketken şaşynan sipap atyn sūrap edım, betıme ürpie qarady. Qazaqtyŋ naǧyz qara balaqaiy. Älgı kelınşektıŋ odan ekı jastai ülken qyzy bar eken. Ol da qara qyz.
- Ainalaiyn, atyŋ kım? - dep sūradym. Ol bırdeŋe dedı. Şal bola bastaǧan atanyŋ qai oŋǧan qūlaǧy bar deisıŋ, atyn qaita sūrap edım, “Iа kazahskii ne znaiu” dedı. Külıp jıberdım. Taǧy da tekke küleiın be:
- Ainalaiyn, mynau ūiat boldy-au, sen qazaqşa bılmeisıŋ, al men orysşa bılmeimın. - dep anasyna qaradym. Ol ün qatpady. Bälkım yŋǧaisyzdanǧan türı bolar. Bıraq oǧan qaraityn men be:
- Qaraǧym, üige barǧan soŋ mynalarǧa nan - hleb, sol - tūz, su - voda, äke - otes, äje -babuşka dep üiret. Menıŋ deduşka ekenımdı ait, - dedım.
Olar esıkke qarai qozǧaldy.
Qoldaryna telefon ūstap, qūlaqtaryn bıtep alǧan örımdei-örımdi jastar, myna adam jyndy ma özı, degen sekıldı bedıreiıp-bedıreiıp qarap tūrdy.
"Äi, eaman-ai, Aqseleu aǧa jaǧdai däl osylai bolatynyn bılıp, jūmaq jerdıŋ qoinyna tez ketken eken-au" dep ışım qan jylady…
