Almaty oblysy men Almaty bıligi megapolısti jeńildetý úshin birqatar joǵary oqý oryndaryn Qonaevqa berý máselesin qarastyryp jatyr. Almaty oblysy ákiminiń orynbasary Arslan Dándibaev stýdentterdiń óndiristik tájirıbeden ótýine múmkindikter jasalatynyn atap ótti, dep habarlaıdy “Adyrna” ulttyq portaly.
“Bizdiń oıymyz – ýnıversıtetterdi kóshirý, qosymsha biliktilik beretin júıeni uıymdastyrý úshin jaqsy kampýstar salý qajet. Sonda stýdentter jarty kún emin-erkin oqı alady, qalǵan jarty kúnde óndiriste jumys isteı alady. Bolashaqta biz orta tehnıkalyq bilimdi damytýǵa basa nazar aýdaratyn bolamyz. Bizde ınjenerler, santehnıkter men sheberdi tabý qıyn”, – dedi Dándibaev.
Odan bólek, ol stýdentterdiń oqýy men tájirıbesi qalaı ushtasatynyna da toqtaldy.
“Kirpish zaýytyn salamyz, jalpy úlken qurylys alańy bolady. Qazir Almatydan óndiristi, ındýstrıaldy aımaqtardy shyǵarýǵa tyrysyp jatyrmyz. Qalany jeńildetýge kómek berý kerek. Al turǵyndardy turaqtandyrýdy qolǵa alý kerek. Osy qalada turyp, jumys isteýge qolaıly jaǵdaı jasaý qajet”, – dedi Dándibaev.
Onyń aıtýynsha, Almatyda ómir men baspananyń aımaqqa qaraǵanda áldeqaıda qymbat ekenin eskersek, joǵary oqý oryndary men kolledjderdiń óńirge kóshirilýi de oń áleýmettik nátıje berýi tıis.
Buǵan deıin Almatyda «Soltústik», «Batys», «Ońtústik-Batys», «Shyǵys qaqpasy» jáne «Tarıhı ortalyq» ataýymen bes polıortalyq paıda bolatyny belgili bolǵan. Olarda qala halqynyń kóp bóligi turady dep boljanýda.
”Adyrna” ulttyq portaly
