Almatyda kommunaldyq aqyly tūraqtardyŋ tarifterın özgertu ūsynyldy. Jaŋa jüie boiynşa tūraq aqysy barlyq aumaqta bırdei 100 teŋge emes, kölık jüktemesıne qarai saǧatyna 100, 150 jäne 200 teŋge bolyp belgılenuı mümkın. Būl turaly Almaty mäslihatynyŋ sessiiasynda Almaty qalasynyŋ jol qozǧalysyn ūiymdastyru jäne jolauşylar kölıgı basqarmasynyŋ basşysy Erjan Dihanbaev aitty, dep habarlaidy “Adyrna”.
Onyŋ aituynşa, qoldanystaǧy bıryŋǧai tarif 2016 jyldan berı özgermegen. Osy uaqyt aralyǧynda Almatydaǧy kölık sany bır millionnan asyp, joldar men tūraq oryndaryna tüsetın jükteme artqan. Äsırese qalanyŋ ortalyq bölıgınde tūraq oryndaryna sūranys joǧary.
Ūsynylyp otyrǧan jaŋa tariftık jüie ekı negızgı körsetkışke negızdeledı: aumaqtaǧy kölık jüktemesı jäne onyŋ funksionaldyq maqsaty.
Kölık qozǧalysy salystyrmaly türde tömen uchaskelerde tūraq qūny saǧatyna 100 teŋge bolyp qalady. Ortaşa jüktemesı bar aumaqtarda tarif 150 teŋge, al tūraq oryndary tapşy ärı sūranys joǧary uchaskelerde 200 teŋgege deiın belgılenuı josparlanyp otyr.
Dihanbaevtyŋ aituynşa, joǧary sūranysqa ie aumaqtardaǧy tariftıŋ ösuı kölık jürgızuşılerın tūraqta ūzaq uaqyt tūrmauǧa yntalandyryp, oryndardyŋ auysymdylyǧyn arttyruǧa mümkındık beredı. Būl öz kezegınde qysqa merzımge kölık qoiu üşın bos oryndardyŋ qoljetımdılıgın jaqsartuǧa baǧyttalǧan.
Aqyly tūraq aimaǧynda ornalasqan üilerdıŋ tūrǧyndary üşın qoldanystaǧy jeŋıldıkterdı saqtau josparlanyp otyr.
Äkımdık mälımetınşe, tūrǧyn üi ielerı arnaiy rūqsat räsımdeu arqyly tūrǧylyqty jerıne jaqyn ornalasqan belgılengen tūraq oryndaryn tegın paidalana alady. Sonymen qatar paidalanuşylardyŋ basqa da jeŋıldık sanattary saqtalady.
Jaŋa tariftık jüienıŋ negızgı maqsaty – tūraq oryndarynyŋ ainalymyn arttyryp, qysqa merzımge kölık qoiatyn jürgızuşıler üşın bos oryndardyŋ boluyn qamtamasyz etu.
Äzırleuşılerdıŋ pıkırınşe, saralanǧan tarifter kölık köp şoǧyrlanatyn köşelerde kölıktıŋ toqtap tūru uaqytyn qysqartuǧa, ekınşı qatarǧa kölık qoiu jaǧdailaryn azaituǧa jäne bos tūraq ızdeuge ketetın uaqytty qysqartuǧa yqpal etuı mümkın.
Sondai-aq būl şara Almatynyŋ ortalyq bölıgındegı kölık jüktemesın azaityp, jol qozǧalysyna qatysuşylardyŋ jürıp-tūru jaǧdaiyn jaqsartuǧa baǧyttalǧan.
