Erıktı bolu – jürektıŋ ısı. Ol üşın ülken jürek pen şeksız meiırım, şynaiy janaşyr bolmys boluy tiıs. Kez kelgen jannyŋ boiynan tabyla bermeitın "janaşyrlyq", "ızgılık" deitın asyl qasietterge ie erıktı jandar, bügıngı azamattyq qoǧamnyŋ ainymas bölşegı. Olar el üşın bılek sybana eŋbek etıp qana qoimai, qoǧamnyŋ "adam" deŋgeiındegı asyl ısterın atqaryp jür. Sondai jandardyŋ bırı, “Almaty erıktıler ligasynyŋ” belsendı müşesı, jas ärı alǧyr Aijan Maratqyzy özınıŋ erıktı retındegı azamattyq pozisiiasy jaily "Adyrna" tılşısıne äŋgımelep berdı.
“Jaqsylyq – adamnyŋ tabiǧi bolmysy”
Aijan erıktıler qataryna kezdeisoq qosylmaǧan. Ol “EHRO-2017” körmesıne qatysqysy kelgenımen, jas mölşerıne bailanysty ırıkteuden öte almaǧan. Alaida būl ony toqtatqan joq. Kerısınşe, ızdenıs jolyna tüsıp, Almatydaǧy “Erıktıler ligasyna” qosylady. Sodan berı qoǧamdyq şaralardyŋ bırde-bırınen tys qalyp körmeptı.
“Erıktı bolu – özıŋdı qajet sezınu. Eşkımnıŋ qysymynsyz, şynaiy nietpen äreket etu – erıktınıŋ basty qasietı. Menıŋşe, būl – qoǧamǧa degen jauapkerşılıktıŋ körınısı”, – deidı Aijan.
Aituynşa, erıktı degenımız – aqy kütpei, adal qyzmet etetın jan. Qaiyrymdylyq, kömek körsetu – halqymyzdyŋ ǧasyrlar boiy jalǧasqan dästürı. Būrynǧy “asar” salty – bügıngı erıktılıktıŋ tamyry desek qatelespeimız.
"Almaty marafonynan – balalar üiıne deiın"
“Erıktıler ligasy” – bügınde on myŋǧa juyq belsendı jasty bırıktırıp otyrǧan ırı platforma. Ūiym bes baǧytta jūmys ısteidı: äleumettık, bılım beru, ekologiialyq, densaulyq saqtau jäne jeke damu. Jas erekşelıgıne şekteu joq – mektep oquşylarynan bastap, zeinetkerlerge deiın qoǧamǧa üles qosyp jür.
Aijan üşın eŋ este qalǧan şara – Almaty marafony. Ol mūndai auqymdy jobalarda volonter bolu – şynaiy ruh pen ūiymşyldyqtyŋ synalar sätı ekenın aitady.
“İä, bız tegın jūmys ısteimız. Keide bızdıŋ eŋbegımız körınbeuı de mümkın. Bıraq erıktı bolu – közge tüsu emes, jürekpen sezınu”, – deidı ol.
Jaqynda Aijan özı bastaǧan alǧaşqy jeke jobasyn ıske asyrypty. “Stan starşim drugom” dep atalatyn būl bastama balalar üiındegı tärbielenuşılerdıŋ armanyna jol aşudy maqsat etedı.
“Muzeige aparǧan kün – men üşın ülken jeŋıs boldy. Ūzaq ızdenıp, kelısıp, senım artuǧa köndıre almai, keide tıptı jylaǧan sätterım de boldy. Bıraq balalardyŋ jüzındegı quanyşty körıp, bar qiyndyq artta qalǧandai boldy”, – deidı Aijan.
Memleket pen qoǧamnan qoldau bar ma?
2020 jyly Qazaqstanda “Erıktıler jyly” jariialanǧany belgılı. Aijannyŋ aituynşa, būl erıktıler qozǧalysyna serpın berdı. Studentter üşın bırqatar qoldaular engızılıp, volonterlık eŋbek aqyly qyzmetke de ainala bastady.
“Ministrlık saǧatyna 1000 teŋge kölemınde aqy belgıledı. Būl – tek tabys közı emes, eŋ bastysy – jastarǧa ülken motivasiia. Köpşılıgı erıktı bola jürıp, öz baǧytyn tauyp, jaŋa dostar tabady”, – deidı ol.
Qoǧam közqarasy – ekıūşty
Aijannyŋ pıkırınşe, Qazaqstanda volonterlık mädeniet qalyptasyp kele jatsa da, qoǧamnyŋ bır bölıgı būl qyzmettıŋ mänın älı tolyq tüsınbei keledı.
“Keide şaralarda bızge auyr sözder aitylyp jatady. Bıraq bız renjımeimız. Öitkenı bız jaqsylyq jasauǧa ūmtylamyz. Qoǧamnan ünemı kütudı doǧaryp, özımız üles qosa bastasaq, bärı özgeredı”, – deidı ol senımmen.
“Erıktıler – qoǧamnyŋ ünsız qaharmandary”
Aijan Mameş – bır ǧana erıktı. Bıraq onyŋ jürıp ötken joly myŋdaǧan jastyŋ armanyna jol aşa alady. Bügın ol – erıktı. Erteŋ – köşbasşy. Qoǧamdy özgertu üşın ülken lauazym kerek emes. Keide jyly söz ben kışkentai kömek te ülken özgerıske bastaidy. Al Aijan sol özgerıstı bastauǧa daiyn jandardyŋ bırı.
