Qazaqstan Kökşetauda JEO qūrylysyn Reseiden qarjylandyrudy kütpesten öz betımen bastap kettı. Būl turaly baspasöz konferensiiasynda premer-ministr Oljas Bektenov mälımdedı, dep habarlaidy “Adyrna”.
Būǧan deiın premer-ministrdıŋ orynbasary Roman Skliar reseilık taraptyŋ jobany qarjylandyruda qiyndyqtarǧa tap bolǧanyn aitqan bolatyn.
«Üş JEO boiynşa bastapqyda reseilık ärıptestermen bırlesıp ıske asyru nūsqasy qarastyrylǧan edı. Alaida Resei tarapynan subsidiialanǧan arzan qarjylandyrudy ūsynu boiynşa naqty aqparat tüsken joq. Sondyqtan Kökşetaudaǧy JEO qūrylysyn bız eşkımge jügınbei, öz küşımızben bastadyq. Qūrylys jūmystaryn «Samūryq-Energo» jürgızude», — dedı Bektenov.
Onyŋ aituynşa, qazırgı uaqytta Qazaqstan Reseiden Öskemen men Semei qalalarynda salynatyn qalǧan ekı JEO-ny qarjylandyru boiynşa jauap kütıp otyr. Eger jaqyn arada jauap bolmasa, būl jobalardy da el öz küşımen ıske asyratyn bolady.
Būǧan deiın Qazaqstan Reseimen bırlesıp Semeide (360 MVt), Öskemende (360 MVt) jäne Kökşetauda (240 MVt) üş kömır JEO saludy josparlaǧany habarlanǧan. Keiın Aqmola oblysynyŋ äkımdıgı Kökşetaudaǧy jaŋa JEO qūrylysyn Zerendı audanyna köşıru turaly şeşım qabyldady.
«İnterfaks» agenttıgınıŋ habarlauynşa, jobalardy jüzege asyruǧa bas merdıger retınde Reseidıŋ «İnter RAO» kompaniiasyn tartu josparlanǧan. Qazaqstan Energetika ministrlıgı jobalardy qarjylandyrudyŋ negızgı nūsqasy retınde Resei ükımetınıŋ subsidiialanǧan nesiesın qarastyrǧanyn mälımdegen. Alaida biylǧy mamyrda Vise-premer Roman Skliar JEO qūrylysyn jürgızuge jäne jabdyq jetkızuge arnalǧan jeŋıldetılgen eksporttyq qarjylandyrudy alu mäselesınde qiyndyqtar tuyndaǧanyn aitqan. Eger reseilık tarap jabdyqty jetkızuge qajettı qarjyny böle almasa, Qazaqstan jaŋa investorlar ızdeitının mälımdegen.
