24 jastaǵy boıjetken jeti aıdan beri ózinen keıingi úsh baýyryn jalǵyz ózi asyraıdy. Dárihanada túngi aýysymda jumys istep, kúndiz "saıası tutqyn" dep tanylǵan anasynyń isin sheshýmen júgiredi, dep jazady "Adyrna".
Aıjannyń anasyn - belsendi Lázzat Dosmambetovany Shymkent soty ótken aptada 3 jyl 7 aıǵa túrmege kesti. Sýdıa ony Qańtar oqıǵasyna baılanysty jappaı tártipsizdik babymen kináli dep tanyǵan.
Sot mundaı úkimdi Dosmambetovanyń basqa bir belsendimen telefondaǵy áńgimesin negizge alyp shyǵarǵan. Sýdıa áńgime mazmunynda "jappaı tártipsizdikke shaqyrý belgileri bar" dep tapqan. Bir qyzyǵy eki belsendi 6 qańtarda, qalada dúrbeleń basylǵan soń sóılesken. Aıjandy "ótip ketken nársege jurtty ekeýara áńgimede qalaısha úndeı alady?" degen saýal mazalaıdy.
Lázzat Dosmambetovanyń tórt balasy bar: 24 jastaǵy Aıjan, 20 jastaǵy Abzal, 15 jastaǵy Muhammedáli jáne 10 jasar Ákejan. Tuńǵyshy Aıjan jumys isteıdi. Abzal – ýnıversıtette, odan keıingi eki ul mektepte oqıdy.
Lázzattyń mamandyǵy – defektolog, meıirbıke. Kóp jyl memlekettik mektep-ınternatta eńbek etken. Aıjan anasyn "eshkimge soqtyqpaıtyn, biraq ózine tıisken kisige esesin jibermeıtin" dep sıpattaıdy.
Onyń sózinshe, alańǵa jete bergende júregine oq tıgen jigitti kóterip kele jatqan bir top adamǵa kezikken. Lázzat sulq jatqan jigitke alǵashqy medıınalyq kómek kórsetýge tyrysqanymen, onyń kóz jumǵanyn biledi.
– Alańdaǵy aıqaı-shýdy estigenim bolmasa, men turǵan mańda tártipsizdik bolǵan joq. "Shal, ket!", "Parlamenttik respýblıka!" dep aıqaılaǵanym ras. Demokratııalyq respýblıkada turǵym keldi, – dedi sotta sóılegen Dosmambetova.
Sheshesi qamaýda otyrǵan jeti aıda Aıjannyń ómiri túbegeıli ózgerdi. Shetelge oqýǵa ketýge ázirlenip júrgende anasy isti bolpy, joldamadan bas tartqan. Aptasyna bes ert anasyna tamaq pen dári-dármek tasıdy. Apta saıyn qalalyq prokýratýra aldyna kelip, basqa belsendilermen birge anasyn bosatýdy talap etedi.
Aıjanǵa qoldaý bildiremin degen kisiler bolsa, karta nómiri osy: 8 (777) 153 31 11
