Bıyl kúzde Qazaqstanda atom elektr stansasyn (AES) salý boıynsha referendým ótedi, dep habarlaıdy “Adyrna” ulttyq portaly. Bul týraly prezıdent Qasym-Jomart Toqaev málimdedi.
«Ózderińiz jaqsy bilesizder, ekonomıkany damytý úshin turaqty energııa kózi kerek. Sondyqtan men atom elektr stansasyn salý máselesin pysyqtaý týraly naqty tapsyrma berdim. Qazir jan-jaqty talqylaý bolyp jatyr. Ártúrli pikir aıtylýda. Bul úderiske buqaralyq aqparat quraldary da belsene atsalysýy kerek», - dedi Toqaev BAQ qyzmetkerlerin marapattaý rásiminde.
Ol elde atom energetıkasyn damytýǵa zor múmkindikter bar dep esepteıdi.
«Shyn máninde, elimizde atom energetıkasyn damytýǵa zor múmkindik bar. Ony durys, ıaǵnı tıimdi paıdalanǵan jón. Osy máselege qatysty sońǵy sheshimdi halyq qabyldaıdy. Referendým bıyl kúzde ótedi. Úkimet naqty datany aıqyndaıdy», - dedi Toqaev.
