Búginde kúıip turǵan taqyryptardyń biri qazaq qyzdarynyń shet el azamatyna turmysqa shyǵýy. Osy rette aıta ketetini buryn Túrkııa men Reseı azamattaryna kúıeýge shyǵatyndar kóp bolsa, búgin de Qytaı azamattaryna shyqqandar aldyńǵy oryndy bermeı tur. Osy taqyrypqa oraı ardager jýrnalıstimiz Gúlmárııa Barmanbekova apaıymyz qazaq qyzdarynyń nege shet eldikterge kúıeýge shyǵýǵa qumar bolǵandyǵyn bylaı saralaǵan eken.
Qazaqtyń qyzdary nege sheteldikterge turmysqa shyǵýǵa umtylady degen saýaldyń jaýabyn ózimshe bylaı topshylaımyn.
Sebep kóp. Taǵdyr aıdap, ala doba arqalaǵan ótpeli kezeńde shetelge jumys izdep baryp, jergilikti ult ókilderimen kóńil jarastyryp birajola qalyp qoıǵan qyzdar bar. Oqý bilim izdep baryp qalyp qalǵandar bar. Bulardyń jóni bólek. Negizinde qyz balany shette oqytýdyń qaýpi de osynda. Oqytpaıyn deseń eldegi bilim sapasynyń sıqy anaý.
Al endi, dáp qazirgi ýaqyttaǵy qyzdardyń sheteldikter eteginen ustap qalýǵa jantalasa umtylysynyń sebebi múldem basqa sııaqty.
1. Bireýdiń qańsyǵy - bireýge tańsyq.
2. Qolda bar altynnyń qadiri joq.
3. Bolǵan saıyn bola tússem degen ashkózdik. (Bul aýqatty otbasylardyń qyzdaryna tán kórinis).
4. Ózgenikine degen áýestik.
Bir joly bolsa da sheteldiń dámin tatyp kórgen qyzdar óz elimizdegi áleýmettik tapshylyqtyń taýqymetin tartqysy kelmeıdi. Ondaǵylardyń bári "jumaqta" ómir súretindeı kórinedi. Bárin kınodaǵydaı elestetedi. Naǵyz jantalas shetelde ekeninen beıhabar. Shymyldyqtyń ar jaǵynda basqa ómir baryn paıymdaýǵa ómirlik tájirıbıeleri jetpeıdi.
Al shetelge shyǵyp kórmegender bóten jurttyń jigitimen turmys qurý arqyly sheteldegi "jumaqqa" umtylady. Onda "jumaq" bar ma, joq pa degen suraqqa tereńdeı bermeıdi. Ras, shetelde (onda da damyǵan elderde ǵana) adam qyzyǵarlyq kórinister barshylyq, biraq bir kórip qaıtý úshin ǵana. Ata babańnyń rýhy sińgen, tabanynyń taby qalǵan topyraqqa jeteri joq. Ólseń, kóriń daıyn. Basqa jurtta kúliń ǵana qalady.
Jas qyzdar osynyń baıybyna bara berer deımisiń.
Gúlmárııa BARMANBEKOVANYŃ áńgimesin tyńdaǵan Aıda Qojmambet
