Memleket basshysy Qasym-Jomart Toqaev BAÁ Prezıdenti sheıh Halıfa ben Zaıd Ál Nahaıannyń qaıtys bolýyna baılanysty osy eldiń jańadan saılanǵan Prezıdenti sheıh Muhammed ben Zaıd Ál Nahaıanǵa jáne bıleýshi áýlettiń músheleri men Ámirlikter halqyna kóńil aıtý úshin Birikken Arab Ámirlikterine bardy. Bul týraly Aqordanyń resmı saıty málimdedi, dep habarlaıdy “Adyrna” ulttyq portaly.
Kóshbasshylardyń kezdesýi Abý Dabıdegi Qasrý-l Mýshrıf Prezıdent saraıynda ótti.
Memleket basshysy Qazaqstan halqynyń jáne jeke óziniń atynan kóńil aıtyp, sheıh Halıfanyń eldi órkendetý jolyndaǵy eren eńbegin atap ótti.
“Ámirlikterdiń el ishindegi jáne halyqaralyq deńgeıdegi kóptegen jetistigi sheıh Halıfanyń esimimen baılanysty. Onyń dana basshylyǵymen BAÁ Taıaý Shyǵystaǵy beıbitshilik pen turaqtylyqtyń kúshti jaqtaýshysy boldy, sonymen qatar búkil arab álemi úshin qarqyndy ekonomıkalyq ósý men áleýmettik damýdyń úlgisi boldy. Sondyqtan biz onyń qaıtys bolýyn BAÁ úshin ǵana emes, búkil álem qoǵamdastyǵy úshin orasan zor qaıǵy dep qabyldaımyz”, – dedi Qasym-Jomart Toqaev.
Qasym-Jomart Toqaev sheıh Halıfa ben Zaıd Ál Nahaıannyń Qazaqstan men Ámirlikter arasyndaǵy qatynastardy damytýǵa eleýli úles qosqanyn atap ótti.
Kezdesý barysynda Qasym-Jomart Toqaev sheıh Muhammed ben Zaıd Ál Nahaıandy BAÁ Prezıdenti bolyp saılanýymen quttyqtap, onyń basshylyǵymen ámirlikterdiń odan ári gúldene beretinine senim bildirdi.
BAÁ Prezıdenti óz kezeginde osyndaı aýyr jaǵdaıda arnaıy kelip, jeke qoldaý kórsetkeni úshin Qazaqstan kóshbasshysyna rızashylyǵyn bildirdi, sondaı-aq elorda kósheleriniń birine sheıh Halıfanyń aty beriletinine alǵysyn aıtty.
Kezdesý sońynda Memleket basshysy BAÁ Prezıdentin Qazaqstanǵa saparmen kelýge shaqyrýyn naqtylady.
”Adyrna” ulttyq portaly
