Qazaqstannyń halyq jazýshysy Muhtar Maǵaýın 2022 jylǵy Memlekettik syılyqtyń irikteýine qatysty Prezıdentke hat joldady, dep habarlaıdy “Adyrna” ulttyq portaly.
Hatta jazýshy úzdik qalamger Turysbek Sáýketaı eń sońǵy irikten ótpeı qalǵandyǵyn, munyń qazaq qoǵamynyń kókeıkesti máselelerin kótergen soqtaly romannyń Memlekettik syılyqqa jetpeı qalýy – oqyrman qaýym úshin úlken ókinish ekendigin atap ótken.
«Aıtpaǵym – qazaq rýhy, qazaq mádenıetine qatysty az ǵana bir ýáj. 2022 jylǵy Memlekettik syılyq talqysy týraly sońǵy habardan estýimshe, búgingi qazaqtyń atpal jazýshysy, tipti ekiniń biri, úzdik qalamger Turysbek Sáýketaı eń sońǵy irikten ótpeı qalypty. Abaı atyndaǵy marapatqa birden bir laıyqty – osy «Jelqaıyq» romany edi. Turysbek – búgin ǵana jetken prozashy emes, ótken on jyldyqtaǵy «Aı qarańǵysy» jáne kez kelgen basqa da romany osy mártebegi tatıtyn. Búgingi báıgege «Jelqaıyq» túsken eken. Aıtary joq, osy jańa ǵasyrda dúnıege kelgen eń ozyq týyndylardyń biri. Mundaı, bıik kórkemdik deńgeıde jazylǵan, búgingi qazaq qoǵamynyń kókeıkesti máselelerin kótergen soqtaly romannyń Memlekettik syılyqqa jetpeı qalýy – kóńilinde alalyq joq zııaly qaýym úshin, kózi qaraqty, ult múddesin oılaıtyn oqyrman qaýym úshin úlken ókinish bolar edi.
Turysbek Sáýketaıdy laıyqty syılyǵyna jetkizý endigi Sizdiń qolda tur dep bilemin...», – delingen prezıdent Toqaevqa joldaǵan hatynda.
