Syrtqy ister mınıstrligi Ýkraınadaǵy soǵysqa Qazaqstan azamattary qatysqany týraly quzyrly organdardan eshqandaı aqparat alǵan joq. Bul týraly SIM resmı ókili Aıbek Smadııarov málimdedi, dep habarlaıdy “Adyrna” ulttyq portaly.
"Ýkraınanyń quzyrly organdarynan Qazaqstan azamattarynyń Ýkraına aýmaǵyndaǵy qarýly qaqtyǵysqa qatysqany nemese ustalǵany týraly eshqandaı aqparat alǵan joqpyz. Sonymen birge, ózderińiz biletindeı, mundaı áreketter Qazaqstan Respýblıkasynyń zańnamasyna sáıkes qylmystyq jaýapkershilikke tartylady", - dedi mınıstrlik ókili.
Eske salaıyq, buǵan deıin áleýmettik jelide ózin qazaqpyn dep tanystyrǵan azamatty ýkraınalyq áskerılerdiń ustap alǵany túsirilgen vıdeo paıda bolǵan edi. Alaıda bul joly vıdeodaǵy tutqynnyń qazaqstandyq ekenine eshqandaı dálel kórsetilmegen.
