Esimi elge áıgili jazýshy-dramatýrg, qazaq ádebıetiniń klassıgi Dýlat Isabekovtyń úıindegi jeńgemiz Nurǵaısha Jarmuqamedova qaıtys boldy degen habar qabyrǵamyzdy qaıystyryp ketti. Ol kisi eshqandaı aýyryp júrgen joq-tyn, búgin tańerteń júregi ustap qaldy deıdi.
Jaqynda ǵana kókemizge sálem berýge úıge barǵanda jarqyldap júrip qarsy alyp, seksenge kelse de sergektigin kórsetip, kelinderden beter júgirip, dastarhanyn jaıyp shyǵaryp salyp edi.
“Ekeýmiz 56 jyl otasqan edik, jaıymnyń barlyǵyn jasaıtyn edi, endi meniń jaǵdaıymdy kim oılaıdy?!
Eshqandaı aýyra qoımaǵan edi, aıaq astynan tastap kete bardy. Ekeýmiz bıyl seksen jasymyzdy toılaımyz dep, josparlap júrgen edik.”-dep qamyǵyp otyrǵan Dýlat kókemizdi qalaı jubatýdyń ózi qıyn boldy…
Ótken senbide ǵana kórip edik Dýlat kókemizdi Qazaqstannyń Halyq jazýshysy Qabdesh Jumádildiń jyldyq asynda. Qıyn boldy seksenge kelgende seriginen aırylý!..
Aldy álemniń aldyńǵy qatarly elderinde jarııalanǵan, qazaq ádebıetiniń altyn qazynasyna engen shyǵarmalaryn jazǵanda jaıyn jasaǵan, janyna demeý bolǵan asyl jary, balalarynyń aıaýly anasy bolǵan, alpys jylǵa jýyq qol ustasyp birge júrgen ómirseriginen aırylý aǵamyzǵa aýyr tıgeni anyq…
Berik bolyńyz kóke! Allanyń úkimi ǵoı, qaıtesiz endi. Bul da bir aýyr synaq, myqty bolyńyz! Alla sabyr bersin! Qasıetti Ramazan aıynda dúnıeden ótipti, jánnattan bolsyn jaıy dep tileımiz.
Aldy peıish, arty kenish bolǵaı! Qara orman halqyńyz bar, qalyń qazaǵyńyz bar qaıǵyńyzdy bólisetin, Dýlat kóke, bekem bolyńyz!.
Marqumnyń otbasyna, asyl jary, qazaqtyń kórnekti qalamgeri Dýlat Isabekovke, uldary men qyzdaryna, týǵan-týystaryna, aǵaıyndarǵa kóńil aıtamyz.
Imany salamat bolsyn asyl jeńgemizdiń!
Qazybek ISA,
"Adyrna" ulttyq portaly
