Belgili aqyn, QR Parlamenti Májilisi depýtaty Qazybek Isa Jańa jyl - Barys jylynyń alǵashqy kúnderi álemge áıgili jazýshy-dramatýrg Dýlat Isabekti “Aq jol” partııasynyń Alash arystary qurmetine arnap shyǵarǵan “Qazaq Respýblıkasyna 100 jyl” altyn medalymen marapattady.
“Bórte” dramasy úshin respýblıkalyq “Qazaq úni” ulttyq portaly-gazetiniń dástúrli “JYL ADAMY” - “JYL DRAMATÝRGI” nomınaııasyn tapsyrdy.
-Dýlat Isabek aǵamyz “Bórte” dramasy úshin respýblıkalyq “Qazaq úni” ulttyq portaly-gazetiniń dástúrli “JYL ADAMY” - “JYL DRAMATÝRGI” tańdaýyn basym daýyspen jeńip aldy,-dedi Qazybek Isa quttyqtaý sózinde.
- Biz astanada “Bórte” spektaline bılet alý úshin mınıstrge deıin shyǵýǵa týra kelip, zorǵa taptyq. Al eki kún ótken premeranyń ekinshi kúni bir kásipker jigitterdiń “100 myń teńgege bolsa da eki bılet taýyp berińdershi” degenin esittik elden. Teatrǵa kirý bıletiniń mundaı kóp eselenip kóterilgenin birinshi ret kórdik.
“Bórte” - álem nazaryn aýdaryp otyrǵan úzdik drama. Basty ereksheligi - álemdi bılegen qaharly Shyńǵys hanǵa qundy keńester berip, kerek kezinde kemshiligin de betine aıta alǵan jalǵyz adam - tórtkúl dúnıeni bılegen tórt ulynyń anasy - Bórteniń qaısarlyǵy men danyshpandyǵy, ıaǵnı Qazaq áıeliniń úzdik kórkem shyǵarmanyń basty keıipkerine aınalýy.
Bul drama qazir birneshe el sahnasyna daıyndalyp jatyr. Kezinde jarty álemdi jaýlaǵan Shyńǵys han qylyshymen jetpegen jerge Bórte jetti Dýlat Isabektiń qalamymen!-dedi aqyn Qazybek Isa.
Birtýar tulǵa, ardaqty aǵamyz da inisi Qazybek Isany “Adyrna” ultyq portaly uıymdastyrǵan Feısbýktiń mıllıonǵa jýyq jazylýshysy bar 7 tobyndaǵy jalpyhalyqtyq daýys berýde ““JYL ADAMY” - “JYLDYŃ ÚZDIK DEPÝTATY” atanýymen arnaıy quttyqtap, qurmettep shapan japty!
-Qazybek Isa parlamentke ózgeris ákeldi. Ulttyq múddeni qorǵap, sańqyldap shyǵyp jatqan depýtattyq saýaldary eldiń muńyn jetkizýimen jáne sheshen tilde ótkir aıtylýymen erekshelenip otyr. Jalpy, halyq únin jetkizip, qaırat tanytyp otyrǵan “Aq jol” partııasyna Aq jol tileımin”-dedi Dýlat Isabek
Dúldúl qalamger Dýlat Isabektiń bıyl kúzde tolatyn 80 jas mereıtoıyn atap ótýge kóptegen elder yqylas bildirýde.
Azamat TASQARAULY,
"Adyrna" ulttyq portaly
