15 naýryzda Taldyqorǵanda sot otyrysy ótip, bıologııa pániniń muǵalimine balaǵat sózder aıtqan oqýshynyń anasyna aıyppul salyndy, dep habarlaıdy "Adyrna" ulttyq portaly azattyq-ruhy.kz-ke silteme jasap.
Barsha jurttyń jaǵasyn ustatqan jaǵdaı 11 naýryzda Taldyqorǵandaǵy No4 mektepte vıdeoǵa túsip qalǵan bolatyn. 9-synyp oqýshysy bıologııa sabaǵynda dóreki sózder aıtyp, áıel muǵalimge aıǵaılady. Osy oqıǵadan soń muǵalim polıııaǵa aryzdanǵan.
Quqyq buzýshynyń ornyna oqýshynyń anasy jaýap berýge kelgen. Zań ata-ananyń bireýine balaǵa jaýapty tulǵa retinde áreket etýge múmkindik beredi. Ulyn tárbıeleý jónindegi mindetterin oryndamaǵany úshin anasyna QR ÁQBtK-niń 3-bóliginiń 127-baby «Kámeletke tolmaǵan balany tárbıeleý jónindegi mindetterdi oryndamaý» boıynsha 42 myń teńge aıyppul salyndy.
Áıel muǵalimnen keshirim surap, ulynyń ustamdylyq tanytpaǵanyna qynjylatynyn bildirdi.
«Ana retinde sizdi túsinemin, keshiremin, biraq ustaz retinde men qatty qorlandym. Ustaz mártebesi aıaqqa taptaldy», - dedi muǵalim sotta.
Synypta bolǵan jaǵdaıǵa oqýshynyń anasy tikeleı kináli bolmasa da, onyń áreketinde ákimshilik quqyqbuzýshylyq quramynyń obektıvtik jaǵy bar, ıaǵnı ol balasyna durys tárbıe bere almaǵan. Oqýshynyń barlyq synyptasynyń aldynda osyndaı minez-qulyqqa jol bergenin eskersek, bala tárbıesinde úlken olqylyqtar bolǵanyn aıtýǵa bolady.
Eske salsaq, oqýshy 14 naýryzda QR ÁQBtK-niń 434-babynyń 1-bóligi «Usaq buzaqylyq» boıynsha jazaǵa tartylyp, 5 AEK kóleminde aıyppul salyndy. Balanyń jumys istemeıtinin jáne tabysynyń joq ekeni eskerilip, ol aıyppul da anasynyń moınyna júkteldi.
"Adyrna" ulttyq portaly
