Qazaqstannyŋ alǧaşqy teatr suretşısı, halyq şeberı Lätipa Qojyqovanyŋ tuǧanyna biyl 125 jyl boldy. Osyǧan orai Qyzylorda körkemsuret galereiasynda «Qojyqovtar qoltaŋbasy» atty körme aşyldy.
Körmenıŋ aşyluyna Almaty qalasynan Lätipa Qojyqovanyŋ nemeresı Säule Qūlahmetqyzy jäne öner iesınıŋ ärıptesterı men şyǧarmaşylyǧyn zertteuşı ǧalymdar qatysty.
Oblys äkımı Qyrymbek Köşerbaev Qojyqovtar dinastiiasy - kielı Syr topyraǧynan şyqqan öner älemınıŋ biık şyŋyn baǧyndyrǧan, sol öner ölkesınde qoltaŋbasy qalǧan, qazaq mädenietınde öz orny bar dinastiia ekenın atap öttı.
Lätipa Qojyqovanyŋ jary, äulettıŋ basşysy, Qoŋyrqoja Qojyqov «qyrǧyz» atalyp kelgen ūlttyŋ «qazaq» degen tarihi ärı naqty atauyn qalpyna keltıruge öz ülesın qosqan ǧalym.
Ūldary - Qūlahmet, Qojahmet, Nūrahmet, Sūltan-Ahmet syndy on sausaǧynan öner tamǧan azamattar ūlt önerınıŋ törınen öz oryndaryn aldy. «Qazaqty älemge qazaq retınde tanytqan ekı dünie bar.
Onyŋ bırı - Mūhtar Äuezovtıŋ «Abai joly» epopeiasy bolsa, ekınşısı, qazaq kino önerınıŋ tarihynda altyn ärıppen jazylǧan, älemnıŋ 80-ge juyq elınde körsetılıp, baǧasyn alǧan «Qyz Jıbek» filmınıŋ rejisserı, tektınıŋ tūiaǧy Sūltan-Ahmet Qojyqov ekenı bärımızge aian. Äulettıŋ anasy, sän jäne qoldanbaly öner şeberı Lätipa Qojyqovanyŋ qazaq qolönerıne qosqan ülesı ūşan-teŋız.
Ekınşı düniejüzılık soǧys jyldary memlekettık tapsyryspen Lätipa Mūŋaitpasqyzynyŋ qolynan şyqqan qazaqtyŋ ūlttyq kiımı 1933-1945 jyldarda AQŞ prezidentı bolǧan Franklin Ruzveltke syiǧa tartylǧan.
Qazır ol AQŞ-taǧy Ruzvelt muzeiınde saqtauly. Sondai-aq, ejelgı qazaq qolönerı dästürınde toqylǧan sändık būiymdary men ūlttyq kiım ülgılerın Almatydaǧy Ä.Qasteev atyndaǧy Öner muzeiınen köruge bolady», - dedı aimaq basşysy.
Lätipa Qojyqovanyŋ nemeresı Säule Qūlahmetqyzy äulet ömırınen estelıkterımen bölısıp, alǧys aitty. Odan keiın qonaqtar şeberdıŋ 70 suretı qoiylǧan körmemen tanysty.
Sondai-aq, bügın «Lätipa Qojyqova jäne qazaqtyŋ ūlttyq suret önerı» atty ǧylymi-praktikalyq konferensiia ötkızılıp, belıgılı rejisser Bolathan Nüsıpbekovtyŋ Qojyqovtar äuletınıŋ ömırı men şyǧarmaşylyǧyna arnalǧan «Tarlan» derektı filmınıŋ tūsauy kesıldı.
_______________________________________________________________________________________________________________________
inform.kz
Ūqsas jaŋalyqtar
