Qazaqstannyń alǵashqy teatr sýretshisi, halyq sheberi Látıpa Qojyqovanyń týǵanyna bıyl 125 jyl boldy. Osyǵan oraı Qyzylorda kórkemsýret galereıasynda «Qojyqovtar qoltańbasy» atty kórme ashyldy.
Kórmeniń ashylýyna Almaty qalasynan Látıpa Qojyqovanyń nemeresi Sáýle Qulahmetqyzy jáne óner ıesiniń áriptesteri men shyǵarmashylyǵyn zertteýshi ǵalymdar qatysty.
Oblys ákimi Qyrymbek Kósherbaev Qojyqovtar dınastııasy - kıeli Syr topyraǵynan shyqqan óner áleminiń bıik shyńyn baǵyndyrǵan, sol óner ólkesinde qoltańbasy qalǵan, qazaq mádenıetinde óz orny bar dınastııa ekenin atap ótti.
Látıpa Qojyqovanyń jary, áýlettiń basshysy, Qońyrqoja Qojyqov «qyrǵyz» atalyp kelgen ulttyń «qazaq» degen tarıhı ári naqty ataýyn qalpyna keltirýge óz úlesin qosqan ǵalym.
Uldary - Qulahmet, Qojahmet, Nurahmet, Sultan-Ahmet syndy on saýsaǵynan óner tamǵan azamattar ult óneriniń tórinen óz oryndaryn aldy. «Qazaqty álemge qazaq retinde tanytqan eki dúnıe bar.
Onyń biri - Muhtar Áýezovtiń «Abaı joly» epopeıasy bolsa, ekinshisi, qazaq kıno óneriniń tarıhynda altyn árippen jazylǵan, álemniń 80-ge jýyq elinde kórsetilip, baǵasyn alǵan «Qyz Jibek» fılminiń rejısseri, tektiniń tuıaǵy Sultan-Ahmet Qojyqov ekeni bárimizge aıan. Áýlettiń anasy, sán jáne qoldanbaly óner sheberi Látıpa Qojyqovanyń qazaq qolónerine qosqan úlesi ushan-teńiz.
Ekinshi dúnıejúzilik soǵys jyldary memlekettik tapsyryspen Látıpa Muńaıtpasqyzynyń qolynan shyqqan qazaqtyń ulttyq kıimi 1933-1945 jyldarda AQSh prezıdenti bolǵan Franklın Rýzveltke syıǵa tartylǵan.
Qazir ol AQSh-taǵy Rýzvelt mýzeıinde saqtaýly. Sondaı-aq, ejelgi qazaq qolóneri dástúrinde toqylǵan sándik buıymdary men ulttyq kıim úlgilerin Almatydaǵy Á.Qasteev atyndaǵy Óner mýzeıinen kórýge bolady», - dedi aımaq basshysy.
Látıpa Qojyqovanyń nemeresi Sáýle Qulahmetqyzy áýlet ómirinen estelikterimen bólisip, alǵys aıtty. Odan keıin qonaqtar sheberdiń 70 sýreti qoıylǵan kórmemen tanysty.
Sondaı-aq, búgin «Látıpa Qojyqova jáne qazaqtyń ulttyq sýret óneri» atty ǵylymı-praktıkalyq konferenııa ótkizilip, beligili rejısser Bolathan Núsipbekovtyń Qojyqovtar áýletiniń ómiri men shyǵarmashylyǵyna arnalǵan «Tarlan» derekti fılminiń tusaýy kesildi.
_______________________________________________________________________________________________________________________
inform.kz
