Instagram-daǵy kyn.kz paraqshasynda «Dıkıı Arman» laqap atymen tanymal Arman Jumageldıevtiń anasy Roza Hamzaqyzynyń ulynyń atynan qyrǵyz halqynan keshirim suraǵan vıdeosy jarııalandy. Ol qyrǵyz halqynyń qyzyn kelin etip, nemere súıip otyrǵanyn aıtty, dep habarlaıdy "Adyrna" ulttyq portaly.
"Dıkıı Armannyń" anasy Roza Hamzaqyzy qazaq pen qyrǵyz óte jaqyn ekenin aıtyp, ulyna túsinistikpen qaraýlaryn surady.
«Assalaýmaǵaleıkým, Qyrǵyz eli! Sizderdiń aldyńyzǵa úlken basymmen kelip otyrǵan men 70-tegi zeınetkermin! Jumageldıeva Roza Hamzaqyzy. Jumageldıev Arman Baqytulynyń anasymyn. Ony «Dıkıı Arman» dep tanısyzdar ǵoı. Al sizderden ol talaı ret keshirim surar edi, qazir endi osyndaı jaǵdaıda otyrǵannan keıin sonyń atynan, óziniń atynan sizderden keshirim suraımyn. Ol bir jerde durys sóılemegen shyǵar, durys túsinbedi. Eki ortada ulttyq arasyzdyq bolyp ketti, júregim aýyrdy. Onyń shyn máninde ondaı jaman oıy joq edi. Shyn máninde, ol qyrǵyz elin óte jaqsy kóredi, árqashan da maqtan tutady. «Qandaı boevoı, qandaı patrıot, keremet halyq qoı» dep árqashan da maqtan tutady. Allanyń buıryǵy shyǵar, sol qyrǵyzdyń qyzyn alyp, quda-qudaǵı bolyp otyrmyz. Qyrǵyzdyń qyzy, InshaAlla Aıkól Alıkjanqyzy maǵan tuńǵysh nemeremdi týyp berip otyr. Biz baqytty ómir súrip otyr edik. Sońy kórýge kelgen edi ǵoı... Osyndaı jaǵdaıǵa dýshar bolady dep kim bildi? Men sizderden taǵy da keshirim suraımyn! Biz óte jaqynbyz! Quda-qudaǵımyz. Qudaǵı myń jyldyq deıdi, kúıeý bala júz jyldyq deıdi. Paıǵambar kúıeý balasyn syılaǵan. Sondyqtan da syılap, qabyldap, keshirip, Alla taǵala jaqsy qarym-qatynasta bolaıyq! Ótinish sizderden», – dedi anasy.
Jeli qoldanýshylary beınejazbaǵa qatysty ártúrli pikir qaldyrdy.
«Qanshama adamdar óldi Arman úshin eldi smolaǵa batyryp, endi qaı betińmen shyǵyp tursyń?", "Qaıdan keshsin júrekte jara bar. Aptaldaı erkek ózi surasyn, bárin laıǵa batyrdy", "Bostan bosqa qyrǵyzdardan keshirim suramaǵan bolar bir shıkilik bar ǵoı", "Qyrǵyzdardan ne úshin surap otyr túsinbedim, qazaqtardan she", "Birinshi qyrshyn ketken bozdaqtardyń ata-anasynan, halyqtan suraý kerek shyǵar keshirimdi", "Qazaq halqynan emes, qyrǵyz halqynan keshirim suraǵanyn túsinbeı otyrmyn" - dep jazdy kópshilik.
"Adyrna" ulttyq portaly
