Memleket basshysy Qasym-Jomart Toqaev aldaǵy joldaýda qańtar oqıǵasyna qatysty tergeý qorytyndylary týraly aıtady, dep habarlaıdy "Adyrna" ulttyq portaly. Bul týraly Prezıdenttiń baspasóz hatshysy Berik Ýálı óziniń feısbýk paraqshasynda jazdy.
"Memleket basshysy qańtar oqıǵasy boıynsha aldyn-ala tergeý jumystarynyń qorytyndylaryn naýryzdaǵy Qazaqstan halqyna Joldaýynda jarııalaıtynyn josparlap otyr. Qasym-Jomart Toqaev «Qazaqstan» telearnasyna bergen keshegi suhbatynda aıtqanyndaı, halyqtan eshteńeni jasyryp qalmaıdy. Barlyq aqparat jarııa etiledi. Qazir tıisti organdar aýqymdy tergeý jumystaryn júrgizýde. Buǵan biraz ýaqyt kerek.
Prezıdent suhbat barysynda atap ótkendeı, qoǵamdaǵy eń mańyzdy másele – zań ústemdigi. Dál osy quqyqtyq prınıp negizinde qańtar oqıǵasy barysynda ustalǵan azamattardyń jaýapkershilik máselesi sheshiledi. Olardyń basym kópshiliginiń jazasy jeńildetilgeni málim. Júzdegen adam tergeý ızolıatorynan bosatyldy. Qamaýdaǵy azamattardyń quqyqtaryn qorǵaý jumystary júrgizilip jatyr. Quqyq qorǵaý organdary qyzmetkerleriniń zańsyz is-áreketterine baılanysty da tekserý júrgizilýde. Sonymen qatar aýyr qylmys (kisi óltirý, tonaý, qaraqshylyq jáne t.b.) jasaǵandar zańǵa sáıkes jazaǵa tartylady, - dep jazdy Berik Ýálı.
Onyń aıtýynsha, Prezıdent naýryzdyń ortasynda jasaıtyn Joldaýynda saıası reformalar boıynsha óz baǵdarlamasyn usynady.
Sondaı-aq Memleket basshysynyń keshegi suhbaty kórermen qaýymnyń zor qyzyǵýshylyǵyn týǵyzǵanyn atap ótkim keledi. Bul elimizdiń aqparat keńistigindegi mańyzdy taqyrypqa aınalyp úlgerdi dep aıtýǵa bolady. Oǵan álemniń jetekshi agenttikteri belsendi túrde silteme jasaýda. Qasym-Jomart Kemeluly qatty sýyq tıgizip alǵanyna qaramastan, bergen ýádesinde turdy. Prezıdent otandastarymyzdyń atalǵan máselege erekshe alańdap otyrǵanyn eskerip, ulttyq telearnanyń tilshisine beretin suhbatyn keıinge shegermedi",- dedi ol.
"Adyrna" ulttyq portaly
