Bıyl «Jastar praktıkasy» men «Alǵashqy jumys orny» jobasynyń merzimi ózgerip, tólenetin eńbekaqysy kóterildi. Mundaı sharalar memleket basshysy Q.Toqaevtyń tapsyrmasyna saıkes, jastar arasynda jumyssyzdyq dengeıin tómendetý úshin qabyldanǵan.
Bul týraly jumyspen qamtý jáne áleýmettik qorǵaý basqarmasynyń basshysy Balmarjan Narbekova qala ákimdiginiń «Instagram» paraqshasyndaǵy tikeleı efırde baıandady.
«Jastar praktıkasy» baǵdarlamasynyń merzimi 12 aıǵa uzaryp, eńbekaqysy 91 890 (30 AEK) teńge, al «Alǵashqy jumys orny» jobasynyń merzimi 18 aı, tólenetin eńbekaqysy 30 aılyq kórsetkishke ósti.
Bıyl QR Úkimetiniń qaýlysymen «2021-2025 jyldarǵa kásipkerlikti damytý jónindegi Ulttyq joba» sheńberinde qalada 33 500 adamdy jumyspen qamtý sharalaryna qatystyrý bolsa, onyń ishinde 20 759 azamatty turaqty jumysqa ornalastyrý josparlanǵan.
Al, Shymkentte 2022 jylǵa 24 196 jańa jumys ornyn qurý kózdelip otyr. Onyń 14 157 orny turaqty, 9 679-y ýaqytsha. Ulttyq joba negizinde 10 522 jumys orny, 13 674 oryn jeke bastamamen ashylady.
Prezıdenttiń 2022 jyldyń 11 qańtardaǵy keńeıtilgen otyrysyndaǵy bergen tapsyrmasy negizinde, bıyl 18 425 jasty jumyspen qamtý kózdelip otyr.
Ótken jyly 29 jasqa deıingi 2 578 azamat «Jastar praktıkasyna», 351 adam áleýmettik jumys oryndaryna, 3 064-i qoǵamdyq jumysqa, 118 jas «Alǵashqy jumys orny» jobasy arqyly jáne 23 421 adam bos jumys oryndaryna ornalasqan.
Efır barysynda turǵyndar tarapynan 60-tan asa suraq qoıyldy. Basqarma basshysy jumyspen qamtýdyń baǵyttary, kásiptik oqý jáne jastarǵa arnalǵan baǵdarlama jóninde saýaldarǵa jaýap berdi.
