Narazy top: Shahanov Jazýshylar odaǵynan shyǵarylsyn!

3160
Adyrna.kz Telegram

Shahanovtyń qazaq halqynyń áıgili tulǵalaryna til tıgizip, olarǵa qatysty túrli málimdeme jasaýyna qarsy shyqqan narazy Qazaqstan Jazýshylar odaǵyna jınaldy. Olar "dańqty aqyndardyń arýaǵyna tas atyp, rýhyn, jyryn qorlaýǵa" jol bermeıtinderin málimdep, Shahanovtyń odaqtan shyǵarylýyn talap etti dep habarlaıdy "Jas Alash" gazeti.

Osydan birneshe kún buryn Muhtar Shahanovtyń óz óleńinde, izinshe jasaǵan málimdemesinde Jambylǵa, Muhtar Áýezovke, Sábıt Muqanovqa, Muqaǵalı Maqataevqa qatysty daýly pikir aıtqan. Bul pikir áleýmettik jeliler men BAQ-da kóp talqylanyp, narazylyq týdyrǵan. Endi búgin jyr alyby atanǵan aqynnyń urpaqtary arnaıy talap qoıyp otyr.

Narazy top Jazýshylar odaǵy basqarma tóraǵasy Ulyqbek Esdáýlettiń atyna jazǵan ótinish hatqa 560 adam qol qoıǵan. Hatta:

«Qurmetti Ulyqbek myrza!

Bizdiń sizden ótinerimiz:

Jambyl 1936 jyldan Jazýshylar odaǵynyń múshesi, ony qaralaǵan aýyr qylmystyq jala japqan M.Shahanovtyń máselesi qaralyp, ony Jazýshylar Odaǵy múshesinen shyǵarýdy suraımyz.

M. Shahanovty osyndaı aýyr qylmysy úshin Jazýshylar odaǵy basqarmasy sotqa shaǵym túsirip, ádil baǵasyn berip, Jambyldaı uly aqyndy qoldap, qorǵap qalýdy ótinemiz», delingen.

Al qazaq zııaly qaýym ókilderiniń biri Naǵashybek Qapalbekulynyń aıtýynsha, Shahanov Jambyldyń 1501 jyldyq mereıtoıy kezinde aqyndy aýzynan tastamaı maqtaýmen bolǵan.

"1995 jyly Jambyldyń 150 jyldyǵy qarsańynda Qyrǵyzstanǵa bardyq. Sonda qyrǵyz zııaly qaýymymen bas qosyp, dóńgelek ústel ótkizdik. Muhtar Shahanov sonda 3 kún boıy Jambyldy aýzynan tastamaı maqtaýmen boldy. Ol kezde qyzmette júrdi ǵoı. Sol kisi sońǵy kezderi Jambyl atamyzǵa til tıgizip, onyń murasyna shabýyl jasaýdy bastady. Jambyl ǵana emes, bilesizder, qazaqtyń iri-iri tulǵalaryn mansuqtap óleń jazdy, aýyr-aýyr sózder aıtty.

Sodan keıin «Almaty» telearnasyna tikeleı efırge shyqty. Biz halyqtan keshirim suraıtyn shyǵar dep kútkenbiz. Sóıtsek, kerisinshe, álgi aıtqandaryn odan ary indetip, arýaqty qorlady. Buǵan bir toqtaý bolý kerek qoı, sondyqtan qazaq ádebıetiniń qasıetti qara shańyraǵyna kelip, ózimizdiń málimdememizdi berdik. 560 adam qol qoıdy, biraq, bul tizim áldi de óse beredi, áli de qosylyp jatqan adamdar bar, – deıdi Naǵashybek Qapalbekuly.

Al "Shapaǵat-Nur» jýrnalynyń bas redaktory Talǵat Nurqasym:

Qazir ǵana jıynnan shyqtyq. Jazýshylar odaǵynyń basshylyǵy bir aptanyń ishinde bizdiń málimdememiz ben ótinish-talaptarymyzdy arnaıy talqylap, naqty bir sheshimge keletinderin aıtty. Bizdiń basty maqsatymyz qazaqtyń uly tulǵalaryn mansuqtaýǵa jol bermeý. Qazaqtyń zııaly qóaýymy osylaı arýaqty qorlap, bólinip alyp, daýlasyp jatsa kúni erteń qazaq degen ulttan ne tamtyq qalady?! Ult bolamyz desek, keıingi urpaq ata-babalasyna topyraq shashpaýy kerek, kerisinshe olardyń murasyn nasıhattap, urpaqtan urpaqqa pash etip otyrýymyz kerek, – deıdi.

Jazýshylar odaǵy basshylyǵy narazy toptyń ótinishterin arnaıy qaraıtynyn, osy aptanyń ishinde bir sheshimge keletinderin aıtty.

 

Pikirler