Búgin Memleket basshysy Qasym-Jomart Toqaev Haziret Sultan meshitine arnaıy baryp, qańtar oqıǵasy kezinde qaıtys bolǵan azamattardyń 40 kúndigine oraı olardyń rýhyna quran baǵyshtap, qurbandyq shaldy. Sodan keıin meshitte halyqqa úndeý joldady, dep habarlaıdy "Adyrna" ulttyq portaly.
Qasym-Jomart Toqaev quran baǵyshtalǵan soń arnaıy sóz sóıledi. Qazaqstan Prezıdenti bıylǵy jyl elimiz úshin qaıǵyly oqıǵadan bastalǵanyn, halqymyz óte qıyn kúnderdi bastan ótkergenin aıtty.
– Memleketimizdiń tutastyǵyna, azamattarymyzdyń qaýipsizdigine, elimizdiń bolashaǵyna qaýip tóndi. Biz lańkesterge der kezinde toıtarys berip, betin qaıtardyq. Ókinishke qaraı, dúrbeleńde birqatar azamatymyz qaza tapty. Bul – naǵyz qasiret. Qazirgi tańda tıisti mekemeler azamattardyń árbir isi boıynsha tergeý jumystaryn júrgizip jatyr. Adam quqyǵyn qorǵaý máselesi men úshin asa mańyzdy. Qaıǵyly jaǵdaı búkil eldiń qabyrǵasyn qaıystyrdy, – dedi Qasym-Jomart Toqaev.
Memleket basshysy osyǵan baılanysty Jalpyulttyq aza tutý kúni jarııalanǵanyn eske saldy.
– Sol qasiretti oqıǵadan beri 40 kún ótti. Búgin marqumdardyń rýhyna quran baǵyshtaý úshin meshitke arnaıy keldim. Qaza bolǵan adamdardyń jaqyndaryna taǵy da kóńil aıtamyn. Memleket qaraly shańyraqtardy qaraýsyz qaldyrmaıdy. Men qaıtys bolǵan azamattardyń otbasylaryna qarjylaı kómek kórsetýdi tapsyrdym, – dedi Prezıdent.
Qasym-Jomart Toqaev «Qazaqstan halqyna» qory da osy qaıyrymdylyq jumysqa atsalysady dep oılaıtynyn, endi halqymyzdyń tynyshtyǵyn buzýǵa jol berilmeıtinin jetkizdi.
– Halqymyzdyń bereke-birligi men tynyshtyǵyn buzýǵa jol bermeımiz. Bul – bıliktiń ǵana emes, barsha azamattarymyzdyń ortaq boryshy. Mundaı qasiret eshqashan bolmasyn!», – dedi Memleket basshysy.
Sóziniń sońynda Prezıdent Qazaqstan halqyna sabyr, elimizge amandyq, jurtymyzǵa tynyshtyq tiledi Sonymen qatar óskeleń urpaq úshin tutas el bolyp Jańa Qazaqstandy birge qurýǵa shaqyrdy.
"Adyrna" ulttyq portaly
