Aqtóbede sot qart anasyn uryp óltirgen er adamǵa qatysty úkim shyǵardy, dep habarlaıdy "Adyrna" ulttyq portaly.
Sputnik Qazaqstan málimdeýinshe, 51 jastaǵy Aqtóbe turǵyny mundaı qadamǵa 84 jastaǵy anasyna ashýlanǵandyqtan barǵan. Aıtýynsha, áıel tósek tartyp jatqan. Sol keshte uly anasynyń keshki asyn bergen. Alaıda, qart ana tamaqty túkirip, ony jeýden bas tartady. Ashýǵa býlyqqan er adam ony basynan, betinen urǵanyn aıtty. Bir ret keýde tusyna da judyryq siltegen.
Esin jıǵan uly jedel járdem shaqyrǵan. Soqqy izderine qatysty suraqtarǵa ony bir aı buryn belgisiz bireý uryp-soqty dep jaýap beredi. Bul soqqylardan qart áıel bas-mı jaraqatyn alyp, qabyrǵasy synǵany anyqtaldy. Ol alǵan soqqydan kóz jumdy.
Áıeldiń soqqyǵa jyǵylǵany belgili bolǵan soń, ulyna qatysty qylmystyq is qozǵaldy. Sotta er adam anasymen qarym-qatynasy bala kezden kúrdeli bolǵanyn aıtty. Onyń aıtýynsha, ol anasymen túsinise almaǵandyqtan, úıden jıi qashyp ketetin.
- Sol keshte anamnyń tamaqty túkirip tastaǵany ashýymdy keltirdi. Ol dáretin de astyna jiberip qoıatyn. Ony qansha ret urǵanym esimde joq. Keıin jedel járdem shaqyrdym. Men ony óltirgim kelmegen. Bári aıaq astynan boldy, – dedi ol.
Sot ony kináli dep tanyp, 8 jylǵa bas bostandyǵynan aıyrdy.
"Adyrna" ulttyq portaly
