Naýryz - jyl basy, aınalanyń jańarý tusy. Bul kezde tabıǵat uıqysynan oıanyp, úıdegi tirshilikke jan bitedi. Kóktemgi merekeni jeti túrli taǵamnan ázirlenetin kójesiz elestetý múmkin emes. Astana qalasy ákimdigi resmı saıtynyń tilshileri 93 jastaǵy ájeı daıyndaǵan merekelik sýsynnyń dámin tatyp, onyń kóne de erekshe quramyn bilip qaıtty.
Áınesh apanyń shańyraǵynda Naýryz merekesin erekshe qasterleıdi. 93 jasar qarııanyń balalary, nemereleri men shóbereleri aq jaýlyqty anasyn ortaǵa alyp, Ulystyń uly kúnin barlyǵy birge qarsy alýǵa tyrysady.
Jylda osy kúni qart ana tań atysymen erte turyp, Naýryz kójeni ázirleıdi eken. Ol qonaqtarynyń kelgen ýaqytynda sýsynnyń daıyn bolýynyń qamyn jasaıdy. Sol sebepti bul iske eshkimdi aralastyrmaıdy da.
"Biz kishkentaıymyzdan ájelerimizdiń janynda júrip, osy sýsyndy qalaı pisiriletinin kórip júrdik. Áıelderdiń árqaısysy Naýryz kójeni ártúrli daıyndaıdy ǵoı. Mysaly, men kóje qyshqyl bolsyn dep ettiń sorpasyna qurtty ezip qosamyn. Sonda qurttyń tuzy da sorpaǵa jaqsy sińip, kóje tatymdy bola túsedi. Kezinde meniń anam osylaı isteıtin. Keıbir kelinshekter sorpaǵa qurtty emes, aırandy qosady", - dep bólisti Áınesh Samtykova.
"Kezinde Naýryz kójeni dalada taıqazanǵa pisiretinbiz. Kóje daıyn bolǵan soń, ony jıyrma-otyz shaqty adam birneshe keselep ishetin edi. Bastysy, et piskenge deıin ony uzaq qaınatý kerek. Súrlengen et bolsa, tipti jaqsy", – dedi ájeı dastarhan kójeni kesege sapyra quıyp.
Ol Naýryz kójeni ydysqa toltyryp quıyp beriletinin aıtty. Bul - "jańa kelgen jyldan nesibesi ortaımasyn" degen belgini bildiredi.
"Sol quıylǵan kójeni taýysyp ishý kerek, áıtpese yrzyǵy kem bolady", - dedi Áınesh apa.
Naýryz kóje árbir úıde keler jylǵy toqshylyq pen yrys, quttyń joralǵysy retinde dastarhanǵa ózge de ulttyq taǵamdarmen qosa mindetti túrde qoıylady. Samtykovtardyń ishetin Naýryz kójesi ózgeshe, árıne. Qart anany qurmet tutatyn otbasy úlken dastarhan basynda jınalyp, áńgimege dúken qurady, hal surasady, qýanyshtarymen bólisedi.
tengrinews.kz
