Qazaqstandyq tanymal sportshy, MMA faıteri, aralas jekpe-jek sheberi Qýat Hamıtov QR Prezıdenti Qasym-Jomart Toqaev pen IIM Mınıstri Erlan Turǵymbaevqa vıdeo úndeý joldady, dep habarlaıdy "Adyrna" ulttyq portaly.
Ol Memleket basshysyn elimizde oryn alyp jatqan beıbereketsizdikti dereý toqtatýǵa shaqyrdy.
- Naqtyraq aıtsaq, komendanttyq saǵat pen terrorızmge qarsy kúresti toqtatýǵa shaqyramyn. Sebebi, men bizdiń halyq arasynda eshqandaı terrorıst joq ekenin bilemin. Aınalamyzda qazir ne bolyp jatqanyna keler bolsaq, quqyq qorǵaý organdaryna erik berip qoıdy jáne olar naǵyz jappaı tártipsizdik jasaýda! Mıtıngke múlde qatyspaǵan adamdardy eshqandaı mán-jaıdy túsindirmesten alyp ketedi, olardy uryp-soǵady jáne bar qylmysty óz moıyndaryna alýǵa májbúr etedi. Maǵan senińizder, sol jerge jetkizilgender, qalasa da, qalamasa da, óz moıyndaryna bárin alady. Sondyqtan, Prezıdent myrza! Muny toqtatyńyz, boldyrmańyz! Sebebi, bizdiń elde terrorıster bolǵan kúnniń ózinde, muny UQK, IID, IIM bilmeı, olar bizdiń elge kire almas edi, - dedi Qýat Hamıtov.
Qýat Hamıtov qazirdiń ózinde bireýdiń aǵasyn, týysqanyn, otbasy múshesin eshqandaı mán-jaıdy túsindirmesten alyp ketkeni týraly aıtty.
- Maǵan kúnde bireýdiń januıasyn, aǵaıyn-týystaryn eshqandaı sebepsiz alyp ketip jatqany jaıly myńdaǵan habarlamalar keledi jáne olardy óz moıyndaryna kiná alýǵa májbúr etip jatyr. Bir otbasyn atyp tastady, kishkentaı qyz óltirildi. Bunyń bárin bárimiz jańalyqtardan da, ınternetten de kórip otyrmyz. Muny qalaı túsinýge bolady? Muny istegender nege sottalmaıdy? Nege olar jazasyz qalady? Bul qandaı zań? Qalaı? Bul terrorızm bolmasa, terrorızm dep neni aıtýǵa bolady?, - dep kúıindi qazaqstandyq sportshy.
Sonymen qatar Qýat Hamıtov beıbit mıtıng oryn alǵan kúni jaralanǵan adamdar aýrýhanalarǵa túskenin, olardan sońǵy qońyraý sol jaqtan bolǵanyn, sodan keıin olar múlde baılanysqa shyqpaǵanyn atap ótti.
- Sóıtip aýrýhanaǵa týysqandary izdep kelse, olarǵa bireýler keldi de, olardy alyp ketken deıdi. Olar qaıda alyp ketti? Árıne, qarapaıym adamǵa kez-kelgen jaralanǵan adamdy alyp ketýge ruqsat etilmeıdi. Bul "korochkasy" bar adamdar ekeni barlyǵyna túsinikti. Olar "korochkasyn" kórsetti, sóıtip alyp ketti. Olardy qaıda apardyńdar? Demek, adamdy tabý búgingi kúnniń basty máselesi me, álde qalaı? Barlyq jerde kamera bar, eger sizder joǵalyp ketken qarapaıym halyqty taba almasańyzdar, onda qandaı da bir terrorısterdi qalaı tabasyzdar? Nege bul ispen eshkim aınalyspaıdy?
- Sońynda Qazaqstan Respýblıkasy Ishki ister mınıstrligine ótinish bildirgim keledi! Nelikten barlyq bolǵan zańsyzdyqtardan, tártipsizdikterden keıin Ishki ister departamentiniń bastyǵy áli óz ornynda otyr? Osynyń bárinen keıin siz nege halyq kóshege shyǵady deısiz. Árıne, siz ózińiz halyqty kóshege shyǵarýǵa májbúrlep, arandatyp otyrsyz. Álde munyń bári sizdiń paıdańyz úshin be? Nege meniń de, ózgeniń de basynan ótkergen zańsyzdyqtan keıin adamdar joǵalyp, esh mán-jaıdy túsindirmesten zańsyz túrde adamdardy alyp ketip, uryp-soǵyp, kúndiz-túni barlyq kináni óz moınyna alýǵa májbúr etip jatyr? Osydan keıin siz áli de adamdar kóshege shyǵady dep aıtasyz! Múmkin bul sizge paıdaly shyǵar? Múmkin siz adamdar kóshege shyǵýy úshin osynyń barlyǵyn arnaıy istep jatyrsyz ba?, - dedi Hamıtov.
Sóz sońynda, qazaqstandyq sportshy sońǵy ýaqytta, quqyq qorǵaý organdarynyń jumysynda kóptegen zańsyz áreketter bar ekenin málimdedi. "Aqsha úshin qoldan terrorıst jasaǵan Bishkek azamatymen bolǵan jaǵdaıdy alaıyq. Meni ustap alyp ketken jaǵdaıdy esińizde túsirińiz. IID bastyǵy maǵan eki kún boıy jalynyp, vıdeo túsirip, barlyǵyn joqqa shyǵarýymdy ótindi. Men olarǵa kezdesýge barǵanymda, meniń sózderimde eshqandaı ereýil, atys, tóbeles bolmaǵanyn aıttym. Men óz halqym úshin kezdesýge bardym. Osynyń nátıjesinde olar meni vıdeoǵa túsirip aldy. Shamasy olar meni uıatqa qaldyrǵylary keldi. Al men ózimniń halqym úshin, jaqsylyq úshin ishtegi egomdy, ózimdi attap ótýime týra keldi. Meniń oıymsha, sońǵy ýaqytta quqyq qorǵaý organdary bireýdiń tapsyrysyn oryndap otyr nemese óz jumysyn paıdakúnemdik maqsatpen istep jatqan sııaqty" - dedi Qýat Hamıtov óz ınstagram paraqshasynda.
"Adyrna" ulttyq portaly
