رەسەيلىك «بازا» باق-ى اقتاۋ ماڭىندا اپاتقا ۇشىراعان ۇشاقتان الىنعان «جازبالاردىڭ» راستالماعان «ترانسكريپتسياسىن» جاريالادى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
«بازا» AZAL ۇشاعىنىڭ ديسپەتچەرلەرمەن اڭگىمەلەرىنىڭ تولىق ءماتىنىن جاريالادى.
«ازەربايجان اۆيالينيالارى» ەكيپاجى گروزنىيعا قونۋ، ماحاچقالاعا ۇشپاۋ، كەيىن باكۋگە قايتا ورالۋ جانە سوڭىندا اقتاۋعا باعىت الۋ تۋرالى شەشىمدەردى وزدەرى قابىلداعانىن كورۋگە بولادى»، - دەپ حابارلايدى «بازا».
حابارلامادا ديسپەتچەرلەر الدىمەن گروزنىيعا، كەيىن ماحاچقالاعا قونۋدى ۇسىنعانى، رەسەيدىڭ باسقا اۋەجايلارى تۋرالى دەرەكتەر بەرگەنى، بىراق ەكيپاج سول جەرلەرگە قونباۋ تۋرالى شەشىم قابىلداعانى ايتىلادى. سونىمەن قاتار، باق جازبالاردان ەكيپاجدىڭ ديسپەتچەرلەرمەن اڭگىمە بارىسىندا قۇسقا سوقتىعىسۋ جانە بورتتاعى گاز باللونىنىڭ جارىلۋى تۋرالى نۇسقالاردى ايتقانى بەلگىلى بولدى دەپ مالىمدەيدى.
«بازانىڭ» دەرەكتەرى بويىنشا، جازبالاردا ۇشاققا سىرتقى اسەر بولعانى بايقالادى، الايدا پيلوت بورتتا توتەنشە جاعداي جاريالاماعان.
رەسەي تەرگەۋ كوميتەتى اقتاۋ ماڭىنداعى ۇشاق اپاتىنا قاتىستى كەشەندى سوت ساراپتاماسىن تاعايىنداعانىن حابارلادى.
«ديسپەتچەرلىك قىزمەتتەردىڭ، اۋە قوزعالىسىن ۇيىمداستىرۋ جۇيەسىنىڭ جانە اۋە قورعانىس كۇشتەرىنىڭ قىزمەتىنە باعا بەرۋ ءۇشىن كەشەندى ۇيىمداستىرۋشىلىق-تەحنيكالىق سوت ساراپتاماسى تاعايىندالدى»، - دەلىنگەن حابارلامادا.
مەملەكەتارالىق اۆياتسيا كوميتەتىنىڭ ماماندارىمەن بىرلەسىپ، ۇشاقتىڭ جازبا قۇرىلعىلارىنان الىنعان دەرەكتەر تالدانىپ جاتقانىن حابارلادى.
كوميتەتتىڭ دەرەكتەرى بويىنشا، گروزنىي، ماحاچقالا جانە مينەرالدى سۋلار ديسپەتچەرلەرىنىڭ اۋە كەمەسىنىڭ كومانديرىمەن جۇرگىزگەن كەلىسسوزدەرى تالدانۋدا. ۇشاقتىڭ بارلىق جۇيەلەرىنىڭ جاعدايى مەن ماتەريالدىق ايعاقتارى زەرتتەلىپ جاتقانىن اتاپ ءوتتى.
ەسكە سالا كەتەيىك، 25 جەلتوقسان كۇنى اقتاۋ اۋەجايى ماڭىندا Azerbaijan Airlines اۋە كومپانياسىنىڭ باكۋ – گروزنىي باعىتىنداعى جولاۋشىلار ۇشاعى اپاتقا ۇشىرادى. بىراق 26 جەلتوقساندا ەۋروپانىڭ ورتالىق اقپارات قۇرالدارىنىڭ ءبىرى – Euronews تەلەارناسى ۇشاق اپاتىنا رەسەي زىمىرانى سەبەپ بولعانىن حابارلادى. ازەربايجان باق-تارىنىڭ مالىمەتىنشە، بۇل – رەسەيدىڭ «پانتسير-س» اۋە قورعانىس جۇيەسى.
وسىعان دەيىن قازاقستان سەناتورى اندرەي لۋكين اقتاۋ ماڭىندا اپاتقا ۇشىراعان ۇشاقتى اتىپ ءتۇسىرۋ تۋرالى نۇسقانى جاريا تۇردە تالقىلاماۋعا شاقىرعان بولاتىن. 27 جەلتوقساندا رەسەي اۆياتسياسى اپات الدىندا ۇشقىشسىز ۇشۋ اپپاراتتارىنىڭ شابۋىلدارىن قايتارۋ بويىنشا «كوۆەر» جوسپارى اياسىندا جۇمىستار جۇرگىزىلگەنىن مويىندادى. سول كۇنى Azerbaijan Airlines اقتاۋ ماڭىنداعى اپاتتىڭ سەبەبى رەتىندە «فيزيكالىق جانە تەحنيكالىق كەدەرگىلەردى» اتادى.
